15 ኣባላት ሓይሊ ኣየር ኤርትራ፡ ኣብዚ ዝሓለፈ ኣርባዕተ መዓልታት ካብ ስርዓት ህግደፍ ብምምላጥ፡ ምእንቲ ድሕነቶም ንግዚኡ ክንጠቕሳ ኣብ ዘይደለና ሃገር ኣትዮም፡ ፖለቲካዊ ዑቕባ ሓቲቶም ከምዘለዉ ምንጭታት ሓቢሮም።
ናይቶም 15 ኣባላት ሓይሊ ኣየር ኤርትራ ዝርዝር ኣስማትን ተወሳኺ ሓበሬታን ‘ውን በጺሑና ‘ሎ።
ኣባላት ሓይሊ ኣየር ኤርትራ ብተደጋጋሚ ግዜ በብጉጅለ ንስርዓት ህግደፍ ራሕሪሖሞ ናብ ወጻኢ ሃገራት ይኸዱ ብምህላዎም፡ እቲ ውልዶ ሓይሊ ኣየር ኤርትራ ብቐጻሊ ክዳኸም ይርከብ ኣሎ።
መራሒ ስርዓት ህግደፍ፡ ኤርትራውያን ብፍላይ ድማ መንእሰያት፡ ብውልቀምልካዊ ምሕደራኡ ኣስካሕኪሖም ብብዝሒ ናብ ወጻኢ ይስደዱ ከምዘለዉ ኣይእመንን እዩ። ኣብ ዝሓለፈ ሒደት ቅንያት ‘ኳ ምስ መደበር ቴለቪዥን ኣጀዚራ ኣብ ዝገበሮ ቃለመጠየቕ፡ ነቲ ሚኒስተር ዜናኡ ከይተረፈ ሽዑ ንሽዑ ዝተኣመነሉ ጉዳይ ሕቶ ዑቕባ ሃገራዊት ጋንታ ኤርትራ ኣብ ኬንያ፡ “እዚ ንዓይ ሓድሽ ዜና እዩ” ክብል ብጥሪኡ “ኣሉ” ኢሉዎ።
Source::::::::::::::;Assena.com
