ፕረዚደንት ኢሳይያስ ምስ ቻይናዊ መዘናኡ ሺ ዢንፒንግ ተራኺቡ

ፕረዚደንት ዢንፒንግ ምስ ኣባላት ልኡኽ ኤርትራ እናተላለየ፡ ቤዢንግ 15 ግንቦት 2023 ኣብ ቻይና ምብጻሕ ዘካይድ ዘሎ ፕረዚደንት ኢሳይያስ ኣፍወርቂ ምስ ቻይናዊ መዘናኡ ሺ ዢንፒንግ ተራኺቡ።ሺ ዢንፒንግን ነቲ ንፈለማ እዋን ብወግዒ ዝረኸቦ ኣፍሪቃዊ መራሒ ብወተሃደራዊ ሰላምታ ዝተሰነየ ወግዓዊ ኣቀባብላ ገይሩሉ።ክልቲኦም መራሕቲ ድሕሪ'ቲ ወግዓዊ ናይ ኣቀባብላ ስነስርዓት ዝተፈለለዩ ጉዳያት ብምልዓል ተመያይጦም።ፕረዚደንት ዢንፒንግ፡ ክልቲአን ሃገራት ኣብ ዝሓለፈ 30 ዓመታት ኩሉ ሳዕ ኣብ ንሓድሕደን ምትእምማንን ምትሕግጋዝን ከምዝነበረን ገሊጹ ክብል ማዕከን ዜና ቻይና ደይሊ ሓቢሩ።

ቻይናውያን ካብ ሱዳን ኣብ ምውጻእ ኤርትራ "ንዝሃበቶ ደገፍ" መርኣያ ዘለወን "ዓሚቚ ምሕዝነት" ምዃኑ ብምጥቃስ ድማ ንፕረዚደንት ኢሳይያስ ኣመስጊኑ።

ቻይና ምስ ኤርትራ ዘለዋ ርክብ "ስትራተጂካውን ንነዊሕ ዝጠመተን" ምዃኑ'ውን እቲ ቻይናዊ መራሒ ተዛሪቡ።

ኤርትራ፡ ምስ ሃገራዊ ኩነታታ ዝሰማማዕ ናይ ልምዓት ኣንፈት ክትክተል፡ ከምኡ'ውን ልኡላውነታን ጸጥታን ከተውሕስ ቻይና ከምእትድግፍ ዢንፒንግ ገሊጹ። ኣብ ውሽጣዊ ጉዳያት ኤርትራ ንዝግበር ምትእትታውን እገዳታትን ከምእትቃወም'ውን እቲ ቻይናዊ መራሒ ኣነጺሩ።

"ሓባራዊ ጥቕሚ ዘለዎ ምትሕግጋዝ ንምድንፋዕን ብመንገዲ፡ ከም ቻይናዊ ተበግስ ’በልት & ሮድ’ [Belt and Road]፡ ቻይና-ኣፍሪቃ ናይ ምትሕግጋዝ ፎረም፡ ከምኡ'ውን ጠመተ ሰላምን ልምዓት ቀርኒ ኣፍሪቃ ዝተባህሉ ዝተፈላለዩ ተበግሶታት ቻይና ምስ ኤርትራ ክትሰርሕ ድልውቲ እያ"።

ጉጅለታት ሕክምናን ላዕለዎት ክኢላታት ሕርሻን ናብ ኤርትራ ምስዳድ ከምእትቕጽል ዝገለጸ፡ እቲ ዴሳዊ መራሒ፡ ኣብ ኣብ ምህናጽ ትሕተ-ቅርጺ፡ ቴለኮሚኒኬሽን፡ ሕርሻ፡ ዕደናን ሃብቲ ዓሳን ዘሎ ምትሕግጋዝ ንምሕያል ድልውቲ ከምዘላ'ውን ገሊጹ'ሎ።

ፕረዚደንት ኢሳይያስ ብወገኑ፡ ንቻይና ዘለዎ ናእዳ ብምግላጽ፡ ዓለምለኻዊ ርትዒን ፍትሕን ብምምጻእ ኣብ ምዕባለን ገስጋስን ሰብ ዓቢ ኣበርክቶ ክምትገብርን ተዛሪቡ ክብል ቻይና ደይሊ ጸብጺቡ።

"ብዛዕባ ምስ ቻይና ዘለዎ ንልዕሊ ፍርቂ ክፍለዘመን ዝቐጸለ ፍሉይ ምትእስሳር ዝተዛረበ" እቲ ኤርትራዊ መራሒ፡ ህዝቢ ቻይና ንቃልሲ ኤርትራ ዝሃቦ ደገፍ ዘይርሳዕ ምዃኑ ኣመስጊኑ።

እቲ ፈላሚ ወተሃደራውን ፖለቲካውን ስልጠና ኣብ ቻይና ከምዝረኸበ ዝንገረሉ ፕረዚደንት ኢሳይያስ፡ ቅድሚ 15 ዓመታት ንመወዳእታ ግዜ ናብ ቻይና ከምዝበጽሐ ይንገረሉ።