ጸኒሑ ዝተኣለየ ኣዘራራቢ ቃለ መሕትት ኣምባሳደር ኤርትራ ኣብ ደቡብ ሱዳን

ብዛዕባ ህዝባዊ ግንባር ሓርነት ኤርትራ (ሕጂ ህግደፍ) ኣብ ምፍራስ ስርዓት ደርግ ንተቓወምቲ ሓይልታት ኢትዮጵያ ዝሃቦ ደገፍ ኣመልኪቱ ድማ፡ "ህዝባዊ ግንባርሲ ካብ ኢትዮጵያውያን ንላዕሊ'ዩ ብዛዕባ ሓድነት ናይ ኢትዮጵያ ዝሓስብን ዝሰርሕን" ኢሉ።

ኣዲስ ኣበባ ኣብ ዞባ ቀርኒ ኣፍሪቃ ዘይምርግጋእ ትፈጥር ከምዘላን ዝገልጽ እቲ ላዕለዋይ ዲፕሎማሰኛ፡ ብዛዕባ ውሽጣዊ ጉዳያት ኢትዮጵያ'ውን ዘለዎ ርእይቶ ገሊጹ'ሎ።

"እቲ ቘልዓ ናይ ኣራት ኪሎ ነዚ ከባቢ ሓማሚስዎ'ዩ። ሓማሚስዎ ጥራይ ዘይኮነሲ ዘየሎ . . . ብሓጺሩ ነታ ሃገር ብሕልሚ ናይ ወጋሕታ ሰዓት ኣርባዕተ'ዩ ከመሓድሮ ዝፍትን ዘሎ።"

ኣራት ኪሎ ቤት ጽሕፈት ቀዳማይ ሚኒስተር ኢትዮጵያ ዝርከበሉ ክፋል ኣዲስ ኣበባ እዩ።

"ኢትዮጵያ ዝኣክል ሃገር ብሕልሚ ናይ ወጋሕታ ከተመሓድር ምፍታን ከኣ ውጽኢቱ እዚ ንርእዮ ዘለና ይኸውን ማለት'ዩ።"

ዞባ ቀርኒ ኣፍሪቃ ኣብዚ እዋን፡ ብሰንኪ ውሽጣዊ ፖለቲካዊ ቅልውላዋትን ኣብ መንጐ ሃገራት ዘሎ ምትፍናንን ኣብ ወጥሪ ከምዝርከብ ይፍለጥ።

ኣቢይ ኣሕመድ ብሰንኪ ምስ ሶማሊላንድ ዝፈረሞ ናይ ኣፍደገ ባሕሪ፡ ወደብን ወተሃደራዊ መዓስከርን ንምርካብ ዝዓለመ ስምምዕ፡ ኣብ መንጐ ኣዲስ ኣበባን ሞቓድሾን ዞባዊ ወጥሪ ዓሪጉ ኣሎ።

ወተሃደራዊ ምትእትታው ግብጺ ኣብ ሶማልያ፡ ከምኡ'ውን ኣብ መንጐ ግብጺ፡ ኤርትራን ሶማልያን ኣብ ፈለማ ናይዚ ወርሒ ዝተገብረ ስሉሳዊ ምርድዳእ ንኢትዮጵያ ዘነጻጸረ ከይኮነ ከምዘይተርፍ'ዩ ዝግለጽ።

ሱዳን እውን ኣብ ደማዊ ኲናት-ሓድሕድ ተሸሚማ፡ ብከቢድ ሰብኣዊ ቅልውላው ትሳቐ ብምህላዋ ኵነታት ናይቲ ዞባ ዝያዳ ዝኸፍአ ይገብሮ።

ብኲናት ሓድሕድ ዝላደየት ደቡብ ሱዳን'ውን ንባዕላ ጠቕሊላ ካብ ውሽጣዊ ጸገማታ መሊኣ ኣይወጸትን።

ኤርትራ ምስ ዝበዝሓ ካብዘን ሃገራት ዘለዋ ዝምድና ግን ዝነኣድ ምዃኑ'ዩ እቲ ኣምባሳደር ዝሕብር። ሱዳንን ጅቡቲን ናብቲ ኣብ ኣስመራ ዝተበጽሐ ስሉሳዊ ስምምዕ መራሕቲ ሃገራት ግብጺ፡ ኤርትራን ሶማልያን ከምዝጽንበራ'ውን ዘለዎ ተስፋ ገሊጹ።

"ስለዚ ንሕና እቲ ዝምድናታትና በዚ መጠን'ዩ ክግለጽ ዝኽእል ማለት'ዩ። ምስ ሰሜን ሱዳን ዘለና ዝምድና ኣዎንታዊ'ዩ። ምስ ኬንያ፡ ዩጋንዳ ዘለና ዝምድና'ውን ብተመሳሳሊ ብጣዕሚ ጽቡቕ'ዩ" ኢሉ።

እቲ ኣምባሳደር ብዛዕባ ኣማውታ ናይቲ ሓንቲ ሱዳን ክትህሉ ይብህግ ነይሩ ዝበሎ ብሓደጋ ሄሊኮፕተር ዝሞተ ፍሉጥ መራሒ ምንቅስቓስ ሓርነት ህዝቢ ደቡብ ሱዳን ዝነበረ ጆን ጋራንግ'ውን ተዛሪቡ ነይሩ።

"ኤርትራ ካብ ኵሉ'ቲ ከጋጥማ ዝጸንሐ ሽግራት ወጺኣ ኣብዚ እዋን'ዚ ብዛዕባ ልምዓት ብዛዕባ ብልጽግናን ብዛዕባ ካልእ ኣገዳሲ ቍጠባዊ ምዕባለታትን ትሰርሕ ኣላ።"

እቲ ንልዕሊ 10 ዓመት ኣብ ደቡብ ሱዳን ዝሰርሐ ኣምባሳደር፡ ኣብታ ሃገር ኣስታት 1.3 ሚልዮን ዶላር "ካፒታል" ዘለዎ ሓያል ማሕበረኮም ኤርትራውያን ከምዘሎ ብምግላጽ እቲ ኤምባሲ ስሉጥ ቆንስላዊ ኣገልግሎታት ከምዝህብ ሓቢሩ።

ናይ ማሕበረኮም ካርድ ኣባልነት ዘለዎም ጥራይ ልዕሊ 9000 ኤርትራውያን ኣብ ደቡብ ሱዳን ከምዘለዉ ብምግላጽ፡ ድማ ሓደ ንኤምባሲን ቤት ትምህርትን ዘገልግል ህንጻ ናይ ምስራሕ መደብ ከምዘሎ ተዛሪቡ።

ኣብታ ድሮ ልዕሊ ኣርባዕተ ዓመት ጌራ ዘላ ቤት ትምህርቲ ማሕበረ ኮም ልዕሊ 600 ተምሃሮን፡ ልዕሊ 30 ዝተፈላለየ ዜጋታት ዘለዎም መምህራን ከምዘለዉ'ውን ኣምባሳደር ዮውሃንስ ይገልጽ።

ካብ ሃገሮም ሃዲሞም ዝወጽኡ ስደተኛታትን ብንግዳዊ ስራሕን ናብ ደቡብ ሱዳን ከምዝኣትዉ ይፍለጥ።

እቲ ብዙሕ ካልእ ዝርዝራዊ ሓበሬታ ዝሓዘ ግሉጽ ቃለ መሕትት፡ ካብቶም ግሉጻት ኣይኰኑን ተባሂሎም ዝንቀፉ መራሕቲ መንግስቲ ኤርትራ ከምኡ ዓይነት ሓበሬታ ምሃቡ ኣዘራራቢ ኰይኑ ኣሎ።

ይዅን እምበር እቲ ምስ ኤምባሲ ሜድያ ዝተገብረ ቃለ መሕትት ድሕሪ ሓደ መዓልቲ ካብቲ ቻነል ምእላዩ ብዝያዳ ኣዘራራቢ ከምዘኽውን ገይሩዎ'ሎ። እቲ ቃለ መሕትት ስለምንታይ ከምዝተኣልየ ዝተዋህበ ሓበሬታ የለን።

እዚ ከምዚ'ሉ እንከሎ፡ ፕረዚደንት ደቡብ ሱዳን ሳልቫ ኪር ማያርዲት ንኮሚሽነር ጀነራል ፖሊስ ፈደራል ኢትዮጵያ ፕረዚደንታዊ መዳልያ ምትሕግጋዝ ኣብ ጁባ ከምዝሸለሞ ኤምባሲ ኢትዮጵያ ኣብ ደቡብ ሱዳን ሓቢሩ።