ኤርትራ ሓሳብካ ብነጻነት ኣብ ምግላጽ ኣብ መወዳእታ ተሰሪዓ

ብምኽንያት እቲ ሎሚ ዝብዓል ዘሎ መዓልቲ 'ፕረስ'፡ ኣብ ዝወጽአ መግለጺ፡ ናይ ፕረስ ነጻነት ምስ ናይ ዝሓለፈ ዓመታት ክነጻጸር እንከሎ ኣብ ዝኸፈአ ደረጃ ከምዝርከብ ተሓቢሩ። እቲ ናይ 180 ሃገራት ዝሓቆፈ ጸብጻብ፡ እታ ንዝበዝሐ ዓመታት ኣብ ነጻነት ፕረስ ኣብ ድሕሪት እተስራዕ ኤርትራ፡ ሎሚ ዓመት'ውን ኣብ መበል 180 ተሰሪዓ ኣላ።

ኣብቲ ጸብጻብ ሸውዓት ሃገራት ኣፍሪቃ ካብቲ ዝነበረን ደረጃ ከምዝወረዳን እዚ ከኣ ኣተሓሳሳቢ ከምዝኾነን ተማጓቲ መስል ጋዜጠኛታት ኣብ ዘውጽኦ ጸብጻብ ኣብሪሁ ኣሎ።

ብፍላይ ኣብተን ኣብ መበል 143 ዘላ ኡጋንዳ፡ 145 ዘላ ኢትዮጵያን 146 ዘላ ርዋንዳን ናብቲ 'ኣዝዩ ኣሓሳሳቢ' ዝብሃል ደረጃ ምውራደን ዘሻቕል ከምዝኾነ እቲ ጸብጻብ የመልክት።

እታ ኣብ ጭራ መበል 180 ተሰሪዓ ዘላ ኤርትራ፡ ንልዕሊ 24 ዓመታት ዝኣሰረቶም ጋዜጠኛታት ከምዘለዉን፡ እዚ ከኣ ነታ ሃገር ንዝበዝሐ ዓመታት ንጋዜጤኛታት ዝኣሰረት ሃገር ከምዘብላን እቲ ጸብጻብ ገሊጹ ኣሎ።

ኤርትራ ኣብ 18 መስከረም 2001 ነተን ዝነበራ ናይ ግሊ ጋዜጣታት ብምዕጻው ነቶም ኣብአን ዝሰርሑ ዝነበሩ ዝበዝሑ ጋዜጤኛታት ድሕሪ ምእሳር፡ ኣብታ ሃገር ዝኾነ ናይ ግሊ ሚድያ ኣይፈቐደትን።

ሰብ በተን እንኮ መንግስታውያን ማዕከን ዜና ዝኾነ ራድዮ፡ ጋዜጣን ቴሌቪዥንን'ዩ ካብ መንግስቱ ሓበሬታ ዝረክብ።

ኣብ 2001 ብጉጅል 15 ዝፍለጡ ላዕለዎት ሚኒስተራትን መራሕቲ ሰራዊትን ብቅሉዕ ደብዳቤ፡ ቅዋም ክትግበረ፡ ኣኼባ ክካየድን ዝብል ዝርከቦ ሕቶ ናብ ፕረዚደንት እታ ሃገር ምስ ኣቐረቡ'ዩ፡ ማእሰርቶም፡ ምዕጻው ጋዜጤታትን ምእሳር ኣካየድተንን ስዒቡ።

መንግስቲ ኤርትራ እቶም ኣብ መስከረም 2001 ዝኣሰሮም ጋዜጤኛታት ናይ ግሊ፡ ናብ ቤት ፍርዲ ኣየቕረቦምን ብዛዕባ ሃለዋቶም'ውን ክሳብ ሕጂ ዝኾነ ኣይበለን።

እቶም ኣብ 2001 ዝተኣሰሩ ጋዜጠኛታት ዳዊት ኢሳቕ፡ እድሪስ ኣቡዓረ፡ ሰይድ ዓብደልቃድር፡ ፍስሃየ የውሃንስ፡ ኣማንኤል ኣስራት፡ ዮሱፍ መሓመድ ዓሊ፡ ስዩም ጸሃየ፡ መድሃኔ ሃይለ፡ ሳልሕ እድሪስ ሰይድ፡ ዳዊት ሃብተሚካኤል፡ ማትዮስ ሃብተኣብ፡ ሓሚድ መሓመድ ሰይድ፡ ሚልክያስ ሃብተኣብን ሳህለ ጸገዝኣብን'ዮም።

ኣብ ዝተፈላለየ እዋን'ውን ተኣሲሮም ክሳብ ሕጂ ዘይተፈትሑን፡ ተኣሲሮም ዝተፈትሑን ኤርትራውያን ጋዜጠኛታት'ውን ኣዝዮም ብዙሓት'ዮም።