ግጥም ኤርትራን ኢትዮጵያን ኣብ ደቡብ ሱዳን ክካየድ ምዃኑ ተገሊጹ

ሃገራውያን ጋንታታት ኩዕሶ እግሪ ኢትዮጵያን ኤርትራን: ናይ መጻርዪ ዋንጫ ቻምፕዮንሺፕ ኣፍሪቃ ግጥመን ኣብ ደቡብ ሱዳን ከም ዘካይድኦ ተፈሊጡ።እቲ ኣብ ክልቲአን ሃገራት ክካየድ ዝነበሮ ክልተ ዙርያ ግጥማት ኩዕሶ እግሪ ኣብ ከተማ ጁባ ክውዳእ ምዃኑ'ዩ ተገሊጹ ዘሎ።መንግስታዊ ማዕከን ዜና ኢትዮጵያ ከምዝሓበሮ፡ ኣሰልጣኒ መሳይ ተፈሪ ኣብቲ ግጥም ዝሳተፉ ተጻወቲ መነመን ምዃኖም ኣለልዩ ኣሎ። እቲ ጸወታ ስለምንታይ ኣብ ደቡብ ሱዳን ክካየድ ከም ዝተወሰነ ዛጊት ብንጹር ኣይተፈልጠን።

ነዚ ዝምልከት ብወገን ኤርትራ ዝወጽአ ወግዓዊ ሓበሬታ የለን።

"ሃገራዊት ጋንታ ኢትዮጵያ ምስ ኤርትራ ኣብ ጥቅምቲ 31 ከምኡ'ውን 03 ሕዳር ኣብ ዝግበር ናይ ቻን መጻረዪ ውድድር ክልተ እግሪ ጸወታታት ን23 ተጻወቲ ጻዊዒት ቀሪቡ" ይብል እቲ ብመንገዲ ፋና ብሮድካስቲን ዝወጽአ ሓበሬታ።

ኣብዚ ቀረባ እዋናት እናሓርፈፈ ዝመጸ ዲፕሎማስያዊ ዝምድና ክልቲአን ሃገራት ናብ ምትፍናን ገጹ የምርሕ ምህላዉ ይግለጽ።

ኣብ መንጐ ፕረዚደንት ኢሳይያስ ኣፈወርቂን ቀዳማይ ሚኒስተር ኣቢይን ኣብ 2018 ዝጀመረ ምውቕ ዝምድና፡ ኣብ ዝሓለፉ ሒደት ዓመታት ኣዝዩ እናዘሓለን እናሓርፈፈን ይርከብ።

እቲ ብበረራታት መንገዲ ኣየር ኢትዮጵያ ዝቕጽል ዝነበረ እንኰ ቁጠባዊ ርክብ ክልቲአን ሃገራት፡ ኤርትራ ብዝወሰደቶ ውሳነ ድሕሪ ምቁራጹ እቲ ውጥሪ እናገደደ ይመጽእ ኣሎ።

ኣብቲ ንመበል ሻሙናይ ግዚኡ ዝካየድ ዘሎ ውድድር ቻምፕዮንሺፕ ሃገራት ኣፍሪቃ 2024 (CHAN) 40 ሃገራውያን ጋንታታት ክሳተፋ ምዃነን ኮንፈደረሽን ኩዕሶ እግሪ ኣፍሪቃ ይሕብር።

ብመሰረት ካፍ ዘውጽኦ ሓበሬታ፡ እቲ ናይ መጻረዪ ግጥማት ኣብ ክልተ እግሪ ዝካየድ ኰይኑ፡ ነፍሲ ወከፍ ሃገር ሓደ ጸወታ ከተአንግድ ዝገብር'ዩ።

ኣብቲ ኣብ ዝመጽእ ወርሒ ለካቲት ዝካየድ ውድድር 19 ጋንታታት ክሓልፋ ትጽቢት ይግበር።