ብዛዕባ ርክብ ህወሓትን መንግስቲ ኤርትራን መን እንታይ ይብል?

ብዶ/ር ደብረጽዮን ገብረሚካኤል ዝምራሕ ጕጅለ ህወሓት ምስ ኤርትራ "ሕቡእ ርክብ" ከምዘየካየደ ገሊጹ። ኣዘዝቲ ሓይልታት ትግራይን ገለ መራሕቲ ናይቲ ብኣቦመንበር እቲ ውድብ ዝምራሕ ወገን ህወሓትን ምስ ሰበስልጣን ኤርትራ ብስቱር ይራኸቡ ከምዘለዉ ዝገልጹ ጸብጻባት ክወጹ ምጽንሖም ይፍለጥ እዩ።

"ህወሓትን ሰራዊት ትግራይን ምስ መንግስቲ ኤርትራ ሕቡእ ርክብ ከም ዝጀመሩ ኣምሲልካ ምግዋሕ ፍፁም ካብ ሓቂ ዝረሓቐን ዝኾነ ዓይነት መረዳእታ ክቐርበሉ ዘይኽእልን ጥራሕ ዘይኮነስ፤ ተቐባልነት ዘይብሉ ጠቐነ እዩ" ይብል እቲ ካብ ህወሓት ዝወጸ መብርሂ።

እንተዀነ፡ "ምስ ኩሎም ናይ ጎረባብቲ ክልላትን ሃገራትን ህዝብታት ሰላምና ንምርግጋፅን ንምውሓስን ፃዕርና ክቕፅል እዩ" ክብል ህወሓት ገሊጹ'ሎ። "ከም ውድብ፤ ሕዚ 'ውን ንሰላም ዘለና መትከላዊ መርገፂ ብዝኾነ መልክዕ ኣይልወጥን"።

ቅድሚ ሓደ ሰሙን ፕረዚደንት ኢትዮጵያ ነበር ሙላቱ ተሾመ፡ ኤርትራ ነቲ ኣብ ውሽጢ ህወሓት ተፈጢሩ ዘሎ ምምቕቓል ብምምዝማዝ ምስ ገሊኦም ኰይና ሓድሽ ኲናት ክትውልዕ ትሓስብ ኣላ ክብል ከሲሱ ምንባሩ ይዝከር።

ኣስመራ ብወገና "እቲ ደረቐኛ ክሲ፡ ንናይ ኲናት ድሌት [ኢትዮጵያ] ንምኽዋልን ንምምኽናይን ዝዓለመ'ዩ" ክትብል መልሲ ሂባትሉ ነይራ።

ኣብ ፈደራላዊ መንግስቲ ምኒስተር መስኖን ቆላታትን ዝዀነ ዶ/ር ኣብራሃም በላይ ብረቡዕ ምስ መንግስታዊ ተለቪዥን ፋና ኣብ ዘካየዶ ቃለመሕትት'ውን ፖለቲከኛታት ትግራይ ምስ መንግስቲ ኤርትራ ርክብ የካይዱ ከምዘለዉ ተዛሪቡ'ሎ።

"ምስ ካልእ ናይ ወጻኢ ሓይሊ ዝግበር ምንቅስቓሳት ድሌቱ እንታይ እዩ፡ ብምንታይ መልክዕ ይራኸቡ'ለው፡ ንምንታይ ይራኸቡ'ለዉ ዝብል ኵሉ ይፍለጥ'ዩ? እኒመን'ዮም ዝራኸበ ዘለዉ'ውን ይፍለጥ'ዩ።"

"እቲ ዝግበር ዘሎ ርክብ ኮነ እቲ ዝግበር ዘሎ ምንቅስቓስ ንፈደራል [መንግስቲ] ዘስግእ ዓይነት" ከምዘይኰነ ዝምጕት እቲ ምኒስተር "ብፍላይ እቶም ምስ ሻዕቢያ [መንግስቲ ኤርትራ] እናተራኸቡ መጣፍእቲ ዝእልሹ ዘለዉ ተጋሩ" ነቲ ኣብ ልዕሊ ህዝቢ ትግራይ ዝተፈጸመ በደልን ግፍዕን ግምት ዘይህቡ'ዮም ከብል ተዛሪቡ።

"እቲ ሃብቲ ትግራይ ጓሕጒሑ ተሸኪሙ ዝወሰደ ሻዕቢያ. . . ጥዕና ዘይብሉ ርክብ ምግባር" ቅቡል ከምዘይኮነ'ዩ እቲ ከም ምኒስተር ምክልኻል ምስ ሰበስልጣን ኤርትራ ኰይኑ ነቲ ኣንጻር ህወሓት ዝተኻየደ ኲናት ትግራይ ዝመርሐ ዶ/ር ኣብርሃም ዝኸስስ።

ህወሓት ግን እቲ ጠቐነታት ነቲ ኲናት ትግራይ ደው ዘበለ ስምምዕ ፕሪቶርያ ንምዕንቃፍ ዝተማህዘ'ዩ ክብል'ዩ ዝኸስስ ዘሎ።

"ህወሓትን ሰራዊት ትግራይን ኣንፃር መንግስቲ ኢትዮጵያ ንምስላፍ ምስ መንግስቲ ኤርትራ ይራኸቡ ኣለዉ ዝብል መቋረፂ ዘይብሉ ጠቐነታት ብምግዋሕ ኣንፃር ዝተጀመረ መስርሕ ሰላም ቅሉዕ ምንቅስቓስ ክገብሩ ይርኣዩ ኣለዉ" ድማ ይብል።

ዶ/ር ደብረጽዮን ገብረሚካኤል ኣብ መስከረም 2024 ኣብ ዝሃቦ ጋዜጣዊ መግለጺ፡ ኣብ መንጐ ሰበስልጣን ክልል ትግራይን መንግስቲ ኤርትራን ርክባት ይግበር ምንባሩን ክቕጽል ምዃኑን ብወግዒ ተዛሪቡ ነይሩ'ዩ።

ምንጪ ስእሊ,PM Office