ኤርትራ፡ ኣብ ክልል ትግራይ ኣጋጢሙ ዘሎ ቅልውላው "ተራ የብለይን" ትብል

ኤርትራ ኣብ ልዕሊ ኢትዮጵያ ሓድሽ ኲናት ክትከፍት'ያ ዝብል ክሲ "ፍጹም ከምእትነጽጎ" ኣስመራ ገሊጻ። ሚኒስተር ጉዳያት ወጻኢ ኤርትራ ዑስማን ሳልሕ ትማሊ ኣብታ ሃገር ንዘለዉ ቀወምቲ ኣምባሳደራትን ንዲፕሎማሰኛታትን ኣብ ዝሃቦ ዘይልሙድ መብርሂ ኣብ ውሽጣዊ ጉዳያት ኢትዮጵያ ኢዶም ከምዘየእተዉ ተዛሪቡ።

"መንግስቲ ኤርትራ ኣብቲ ኣብ መንጎ ግዝያዊ ምምሕዳር ትግራይን ህወሓትን ዝቕጽል ዘሎ ውሽጣዊ ግጭት ዝኾነ ተራ የብሉን" ክብል ሚኒስተር ዜና የማነ ገብረመስቀል ኣብ ዘውጽኦ ሓበሬታ ጠቒሱ።

ኣብዚ ቀረባ መዓልታት፡ ፕረዚደንት ግዝያዊ ምምሕዳር ኮይኑ ከገልግል ዝጸንሐ ጌታቸው ረዳ ገለ ካብቶም ዝቃወምዎ ኣዘዝቲ ሓይልታት ትግራይን መራሕቲ ህወሓትን ምስ ኤርትራ ርክብ ይገብሩ ኣለዉ ክብል ከሲሱ ነይሩ።

ገለ ሰብመዚ ፈደራላዊ መንግስቲ ኢትዮጵያ'ውን ነቲ ዝተባህለ ርክባት "ጥዕና ዘይብሉ" ክብሉ ገሊጾሞ ነይሮም።

ኣብዚ እዋን ኣብ ትግራይ ዝለዓለ ስልጣን ግዝያዊ ምምሕዳር ከምዝተቖጻጸረ ዝንገረሉ ዘሎ ኣዛዚ ሓይልታት ትግራይ ጀነራል ታደሰ ወረደ፡ ብወገን ላዕለዎት ኣዘዝቲ ምስ ኣስመራ ዝካየድ ርክብ ከምዘየለ ቅድሚ ክልተ መዓልታት ኣብ ዝሃቦ ጋዜጣዊ መግለጺ ተዛሪቡ ነይሩ።

እንተኾነ፡ ኣብ ከባቢ ዶባት ዘለዉ ታሕተዎት ሰብመዚ ኣብቶም ከባቢታት ምርግጋእ ንምውሓስ ዘይስሩዕ ርክባት ከምዝግበር ዝጠቐሰ እቲ ጀነራል፡ ውሱን ሰላማዊ ርክባት ህዝብታት ክልቲኡ ሃገራት ከምዘሎ'ውን ኣሚቱ።

ኣቐዲሙ ርክብ ይግበር ምንባሩ ዝተኣመነ ብዶ/ር ደብጽዮን ገብረሚካኤል ዝምራሕ ህወሓት ብወገኑ ምስ ኤርትራ "ሕቡእ" ርክብ ከምዘይብሉ ምግላጹ ይዝከር።

ኣብዚ እዋን'ዚ፡ ሰራዊት ኢትዮእጵያ ኣብቲ ብወገን ትግራይ ዘሎ ማእከላይ ክፋል ዶባት ህወላወ የብሉን። ፈደራላዊ መንግስቲ ንተኽእሎ ምትእትታው ኤርትራ ንምግታእ ሓይልታቱ ኣብ ዶባት ከዋፍር ጌተቻው ረዳ ክጽውዕ ጸኒሑ'ዩ።

ብወገን ኣዲስ ኣበባ ዝቃላሕ ዘሎ "ብዲፕሎማሲ ይኹን ብወተሃደራዊ ሓይሊ" ኣፍደገ ባሕሪን መዓስከር ሓይሊ ባሕርን ናይ ምርካብ "ግጉይ" ሸውሃት'ውን ከምዘቖጥዓ ኤርትራ'ውን ደጊማ ገሊጻ'ላ።

"ኢትዮጵያ ንልኡላውነትን ግዝኣታዊ ሓድነትን ጎረባብታ ከተኽብር ማሕበረሰብ ዓለምን ኣገደስቲ ኣካላቱን ጸቕጢ ክገብሩላ ኤርትራ ትምሕጸን"።

ሰራዊት ሃገሩ ካብ ዶባቱ ከምዘይሰገረ ዝገለጸ ሚኒስተር ዑስማን ብተወሳኺ፡ ኣብ መስርሕ ስምምዕ ሰላም ፕሪቶርያ ኢዶም ከእትዉ ከምዘይደልዩ ኣነጺሩ።

ምንጪ ስእሊ,Yemane G. Meskel/X