ኤርትራ ሕብረት ኣውሮጳ ዘንበረላ እገዳ ክናዋሕ ምውሳኑ ኰኒና

እቲ ኣብ ፈለማ ሕዳር 2020 ዝተወልዐን ንክልተ ዓመት ዝቐጸለን ኲናት ትግራይ ኣብ ዝካየደሉ ዝነበረ እዋን'ዩ እቲ እገዳ ተወሲኑ። ኣመሪካ'ውን ኣብቲ ዓመት ኣብ ልዕሊ ብ/ጀነራል ኣብራሃ ካሳ፡ ሰራዊት ኤርትራን ትካላት ህግደፍን እገዳ ኣንቢራ ምንባራ ይዝከር።

እቲ ኤምባሲ ኣብ መግለጺኡ፡ "ኤርትራ ኣብ ቃልሲ ንሰባዊ መሰላት ዝተወለደት ሃገር'ያ። ምሉእ ምኽባር ሰባዊ መሰላት፡ ብዝሰፍሐ መልክዑ- ፖለቲካዊ፡ ሲቪካዊ፡ ቁጠባዊ፡ ማሕበራውን ባህላውን፡ ማእከልን ቀንዲን ፖሊሲ" መንግስቲ ኤርትራ'ዩ ክብል ሞጒቱ።

እገዳ ሕብረት ኣውሮጳ እታ ሃገር ንዘመዝገበቶ "ዓቢ ገስጋስ" ሰባዊ መሰላት ኣብ ግምት ዘየእተወ ምዃኑ'ውን እቲ መግለጺ ነቒፉ።

እንተኾነ ግን፡ ምዕራባውያን ሃገራት ይኹና ተሓለቕቲ መሰላት ዘቕርብዎ ቀንዲ ጉዳያት ሰባዊ መሰላት እታ ሃገር ከምዘይተመሓየሸ ሕቡራት ሃገራት ክገልጽ ጸኒሑ'ዩ።

ብሰብመዚ ጸጥታ ኤርትራ ኣብ ቀይዲ ኣትዮም ንዓሰርተታት ዓመታት ዝተሰወሩ ላዕለዎት ሰበስልጣን መንግስቲ ነበር፡ ጀነራላት፡ ጋዜጠኛታት፡ መራሕቲ ሃይማኖትን ተራ ዜጋታትን ብዘይ ዝኾነ ሕጋዊ መስርሕ ክሳብ ሎሚ ኣብ ቀይዲ ይርከቡ።

ኣብታ ሃገር ክካየድ ዝጸንሐ ሃይማኖታዊ ማእሰርቲ'ውን ይቕጽል ከምዘሎ ይፍለጥ። ኣብ ዝሓለፈ ክልተ ወርሒ ጥራይ ብዓሰርተታት ዝቑጸሩ መራሕትን ሰዓብትን ዝተኣገዳ ወንጌላወያን ኣብያተ-ክርስትያን ካብ ገዝኦም እናተኣርዮ ብዘይ ሕጋዊ መስርሕ ተዳጒኖም ከምዘለዉ ተጣበቕቲ መሰላት ሃይማኖት ይሕብሩ።