ሕቡራት ሃገራት ብዛዕባ ምስጓጕ ኤርትራውያን ካብ ኢትዮጵያ ሻቕሎቱ ገሊጹ

ኣብ መወዳእታ ሕዳር'ውን፡ ኣብ ኢትዮጵያ ብፍላይ ከኣ ኣብ ኣዲስ ኣበባ ኣብ ልዕሊ ኤርትራውያን ሰፊሕ ግፋ ከም ዝተኻየደ፡ ብርክት ዝበሉ ኤርትራውያን ካብታ ከተማ ንቢቢሲ ሓቢሮም እዮም።

ከምዚ ዝበለ ተርእዮ ሓድሽ'ኳ እንተ ዘይኰነ፡ ኣብዚ እዋን ዝካየድ ዘሎ ግን ጽዑቕ ጃምላዊ ማእሰርቲ ብምዃኑ፡ ኣብ ዓቢ ሻቕሎትን ተስፋ ምቝራጽን ከም ዘእተዎም ነበርቲ ይገልጹ።

እቶም ካብ ኤርትራ ብዝተፈላለየ ምኽንያት ከም ዝተሰደዱ ዝገልጹ ስደተኛታት፡ ንህይወቶም ዝፍትን ወጽዓ የሕልፉ ከም ዘለዉን ተጸዋዒ ጉዳይ ስደተኛታት ሕቡራት ሃገራት 'ዩኤን ኤች ሲኣር' ንጉዳዮም ኣቓልቦ ክህቦን ጸዊዖም ኣለዉ።

ላዕለዋይ ኮሚሽን ጉዳይ ስደተኛታት ሕቡራት ሃገራት ብወገኑ፡ ብዛዕባ ምእሳር ኤርትራውያን ስደተኛታት ሓበሬታ ከም ዘለዎን ንትካል ስደተኛታትን ተመለስትን ኢትዮጵያ ካብቲ ዘለውዎ ኣብያተ ማእሰርቲ ከውጽኦም ከም ዝሓተተ ንቢቢሲ ትግርኛ ሓቢሩ።

እቲ ኣብ መንጎ ኤርትራን ኢትዮጵያን ንኣስታት 20 ዓመታት ዝቐጸለ "ኵነተ ኲናት"፡ ኣብ 2018 ብዕርቂ ተፈቲሑ'ኳ እንተ ነበረ፡ ኣብዚ እዋን ግን ዝምድና ክልቲአን ሃገራት ጽቡቕ ከም ዘየሎ ይግለጽ።

ኣብ መንጎ ክልቲኣን ሃገራት ዝነበረ ቀጥታዊ በረራ ነፈርትን መስመር ተሌፎንን ተቛሪጹ፡ መራሕቲ ክልቲኣን ሃገራት ወግዓዊ ርክብ ክገብሩ ኣይተራእዩን።

ኣብ መፋርቕ 2023'ውን ኮሚሽን ሰብኣዊ መሰላት ኢትዮጵያ ኣብ ልዕሊ ኤርትራውያን ዝግበር ዘይሕጋዊ ማእሰርትን ግዱድ ምስጓጕን ደው ክብል'ኳ እንተ ተመጻሕጸነ፡ ኣብ መወዳእታ ሰነ 2023፡ ኣብታ ሃገር ክነብሩ ዝጸንሑ ኣስታት 200 ኤርትራውያን ብሓይሊ ናብ ሃገሮም ከም ዝተመለሉ ይዝከር።

ነዚ ጉዳይ ብቐረባ ዝከታተል ዝነበረ ኮሚሽን ሰብኣዊ መሰላት ኢትዮጵያ ድማ፡ "ትሕቲ ዕድመ ዝርከብዎም ኣስታት 200 ዝግመቱ ኤርትራውያን ብግዴታ ናብ ኤርትራ ምምላሶም፡" ከም ዘሻቐሎ መግለጺ ኣውጺኡ።

እቲ ኮሚሽን፡ "ብመሰረት ኣህጉራዊ ሕጊ ሰብኣዊ መሰላትን መትከላት ዘይምምላስን፡ ዝዀነ ሰብ ናብታ ስቅያት፡ ጭካነ፡ ኢሰብኣውን፡ ዘዋርድ ኣተሓሕዛን መቕጻዕትን ዝረኣየላ ወይ ከጋጥሞ ከም ዝኽእል ዝፈርሓ ሃገር ንኸይምለስ ውሕስነት ክወሃቦ ዘገድድ፡" ምዃኑ ብምጥቃስ፡ ነቲ ዝተወስደ ስጕምቲ ነቒፉዎ ነይሩ።

ትካል ኣገልግሎት ጉዳይ ስደተኛታትን ተመለስትን ኢትዮጵያ ግን፡ "ኵሎም እቶም ተመለስቲ ምዝጉባት ስደተኛታት ወይ ሓተትቲ ዕቚባ ኣይኰኑን፡" ክብል'ዩ ነቲ ክሲ ኣብቲ እዋን ነጺግዎ።

ምስዚ ጉዳይ ብዝተሓሓዝ ክኢላታት ሕቡራት ሃገራት፡ መንግስቲ ኢትዮጵያ ንኤርትራውያን ብሓይሊ ናብ ሃገሮም ምጥራዝ፡ ብህጹጽ ደው ከብሎ ጸዊዖም ምንባሮም ይዝከር።

ኣብ ሕቡራት ሃገራት ተጣበቕቲ ሰብኣዊ መሰላት ፍሉይ ተኸታታሊ ኵነታት ሰብኣዊ መሰላት ኤርትራ መሓመድ ባቢከር ዝርከቦም ላዕለዎት ክኢላታት፡ "ጃምላዊ ምስጓግ ብዓለምለኻዊ ሕጊ ክልኩል እዩ፡" ዝብል መግለጺ ኣውጺኦም ምንባሮም ይዝከር።