ነዚ ክውን ካብ ሞንጎ ዝገበራ ብኣጻብዕቲ ዝቝጸራ ኣፍሪቃውያን ሓንቲ ከኣ ኣብ ኩዕሶ ሰክዔት ተጻዋቲት ነበር፡ ኣሰልጣኒትን ተጣባቒት ደቂ-ኣንስትዮን ትውልደ-ኤርትራዊት ፍናን ኣተወብርሃን እያ።
ፍናን ኣብ ኤርትራ ተወሊዳ ጓል ሰልሰተ ዓመት እንከላ ናብ ሱዳን ተሰዲዳ። ብድሕሪኡ ብሱዳን ገይራ ናብ ጀርመን ሰጊራ፡ ኣብኡ ድማ ዓብያ።
ኣብዚ ሕጂ እዋን ኣብ ርዋንዳ ዓለምለኻዊ ፈደረሽን ኩዕሶ ሰክዔት ፍቓድ ዝተወሃባ ተሓጋጋዚት ኣሰልጣኒት ጋንታ 'ኤፒኣር'፡ ኰይና እናገልገልት ትርከብ።
ፍናን ክእለታ ምስ ኣፍቀርቲ ኩዕሶ ሰክዔት ከተካፍል ዕድል ዝሃባ ሞያን ኒሕን ከም ዝዀነ እያ ትዛረብ።
ኣብ ጀርመን ብኢንተርናሽናል ቢዝነስ ዲግሪ ሒዛ። ኣብ ዓባይ ብሪጣንያ ድማ ብምሕደራ ፕሮጀክት ብማስተርስ ተመሪቓ። ኣብ ቴክኖሎጂ ሓበሬታ (ኢንፎርሜሽን ቴክኖሎጂ) ድማ ኣመሓዳሪት ፕሮጀክት ብምዃን ትሰርሕ ኣላ።
ካብ ግዜ ቍልዕነታ ጀሚራ ኣብ ስፖርት ፍሉይ ዝንባለ ነይሩዋ። ብፍላይ ድማ ኣብ ጀርመን ጓል 11 ዓመት እንከላ ብሳላ መምህራ ናብ ኩዕሶ ሰክዔት ክትጽንበር ክኢላ። ካብ ሽዑ ጀሚራ ክሳብ ለበዳ ኮቪድ-19 ኵዕሶ ሰክዔት ክትጻወት ጸኒሓ።
ምስዚ ብዝተኣሳሰር ካብ ስድራቤት ይዅን ካብ መሓዙት ብድሆታት የጋጥማ እንተ ነይሩ ሓቲትናያ።
ፍናን ግን ተጻዋቲት ኣብ ዝነበረትሉ እዋን ካብ ኣሰልጠንታን ስድራቤታን ጽቡቕ ሓገዝ ትረክብ ከም ዝነበረት እያ ትገልጽ።
ኣብ ጀርመን ኣብ ካልኣይ ደረጃ ቡንደስሊጋ ትጻወት ነይራ።
ምንጪ ስእሊ,Finan Atobrhan
ኣብ ከም ሪስት ወደል፡ ኣይንትራክት ፍራንክፈርት፡ ኤሲቲ ካሰል፡ ቲቪ ሆፍሃይም፡ ፒኤስፒ ፓሪስ፡ ዌስትሳይድን ቢሲ ዊስባደን ዝኣመሰሉ ሓያሎ ክለባት ኩዕሶ ሰኪዔት ዝተፈላለያ ሃገራት እውን ተጻዊታ። ኣብ ገለ ካብዘን ክለባት'ውን ኣሰልጣኒት ኰይና ኣገልጊላ እያ።
ገና ጓል 16 ዓመት እንከላ እያ ኣብቲ ጸወታ ንመንእሰያት ከተሰልጥን ጀሚራ።
"ገና መንእሰይ ተጻዋቲት ኰይነ እየ ከሰልጥን ጀሚረ፣ ሽዑ እየ ፍቓድ ረኺበ፡" ክትብል ንቢቢሲ ገሊጻ።
"ብድሕሪኡ ድማ በብደረጃኡ ዝወሃብ ፍቓድ ኣሎ። ንሱ እናሓዝኩ ምስልጣን ቀጺለ፡" ትብል።
በዞም ዝረኸበቶም ናይ ምስልጣን ፍቓዳት ኣቢላ ኣብ ኣፍሪቃ'ውን ክተሰልጥን ጀሚራ።
"ኣብ ግዜ ኮቪድ እየ ናብዚ መጺአ፡" ትብል ናብ ርዋንዳ ዝመጽኣትሉ ኵነታት ክትገልጽ እንከላ። ኣብቲ እዋን ዝነበራ ዕረፍቲ ተጠቒማ ናብ ሃገራት ኣፍሪቃ ገይሻ።
ኣብ ርዋንዳ ዘስተብሃላትሎም ነገራት ግን ነታ ሃገር ዝያዳ ክትፈትዋ ከም ዝገበሩዋ እያ ትገልጽ።
"እቲ ሃገር ሰላም እዩ። ጽሩይ፡ ጸጥታ ዘለዎ፡ ቅዛነት ዘሕድር ኣይኰነን። እቲ ክሊማ እውን ዝለዋወጥ ኣይኰነን። እቶም ነበርቲ እውን ጥዑማት እዮም፡" ብምባል ኣብ ርዋንዳ ክትቅመጥ ከም ዝመረጸት ትዛረብ።
ፍናን ናብ ርዋንዳ ካብ ትመጽእ ጀሚሩ ምስ ሰለስተ ጋንታታት ሰሪሓ ኣላ። እዚአን እውን ታይገርስ ኪጋሊ፣ ኦርዮንን ኤፒኣርን እየን። ብፍላይ ድማ ምስ ጋንታ ኵዕሶ ስክዔት ኤፒኣር ዝበለጸ ተመኵሮ ከም ዘመዝገበት ትጠቅስ።
"ሱፐርካፕ ቍጽሪ ሓደ ተዓዊትና። እዚ ድማ እቲ ዝበለጸ ተመኵሮይ እዩ፡" ትብል።
ደቂ ተባዕትዮ ድሕሪ ሓዳር ይዅን ድሕሪ ቈልዓ ምውላድ፡ ንስፖርት ዝኸውን ግዜ ይረኽቡ እዮም። ፍናን ድማ ኣብ ርዋንዳ ደቂ-ኣንስትዮ ንስፖርት ዝኸውን ግዜ ንኽረኽባን ንኸመቻችኣን ትጽዕር ኣላ።
እዚ ንምግሃድ እውን ሰሙናዊ ስፖርታዊ ውድድራት ከም እተወሃህድ ትገልጽ።
ብፍላይ ኣብ ኩዕሶ ሰኪዔት ተጣባቒት ደቂ-ኣንስትዮ ዝዀነት ፍናን፡ ሓዳርን ማሕበረሰባዊ ሓላፍነትን ንደቂ ኣንስትዮ ካብ ስፖርታዊ ተሳትፎ ክዓግተን ከም ዘይብሉ'ያ ትኣምን።
"ደቂ ኣንስትዮ ዝያዳ ከተባብዕ፡ ኣብ ስፖርት ክሳተፋ ክገብር ድሌት ኣለኒ፡" ትብል ፍናን እዚ ንምግባር እቲ ጻዕሪ ካብ ስድራቤታት ክጅምር ከም ዘለዎን ስድራቤታት ንደቆም ከተባብዑ ከም ዝግባእን ትምዕድ።
"ኣብ ኵዕሶ ሰክዔት ጥራሕ ዘይኰነስ፡ ኣብ ዝዀነ ስፖርት ምስታፍ ከም ሰብ ብዙሕ ነገር'ዩ ዝምህረና፡" ትብል።
ነዚ'ዩ ድማ ኣብ ርዋንዳ ከም ማሕበር ደቂ-ኣንስትዮ ኵዕሶ ሰክዔት ኣጣይሳ ሰሙናዊ ጸወታታት ከተካይድ ትጽዕር ዘላ።
ኣብ ቀጻሊ'ውን ምስልጣን ክትገድፍ ድሌት የብላን። ብኣሰልጣንነት ክእለታ ከተማዕብልን ዝሓሸት ኰይና ክትርከብን'ያ ትምነ።
ብቐንዱ ድማ ናብ ኤርትራ ተመሊሳ ኣሰልጣኒት ኵዕሶ ሰክዔት ክትከውን ሕልሚ ኣለዋ።
ኤርትራ ብቐንዱ ትፍለጥ ብብሽክለታ'ኳ እንተዀነ፡ ብዛዕባ ኵዕሶ ስክዔት "እንግደስ ብዙሓት ኣለና፡" ትብል።
"ኣብ ዓደይ ኵዕሶ ስክዔት ከሰልጥንን ዝያዳ ተፈታዊ ክገብሮን ትምኒት ኣለኒ፡" ክትብል ድማ ባህጋ ገሊጻ።
