ኤርትራ፡ ኢጣልያዊ ሚኒስተር ዝተፈላለዩ ትካላት ይበጽሕ

ኣብ ኤርትራ ወግዓዊ ምብጻሕ ዘካይድ ዘሎ ኢጣልያዊ ሚኒስተር ንግዲን ሃገራዊ ፍርያትን ኣብ ዝተፈላለዩ ቦታት ዑደት የካይድ ኣሎ።

ኣዶልፎ ኡርሶ ዝመርሖ ጉጅለ ሎሚ ኣብ ከባቢ ኣስመራ ንዝርከብ ፋብሪካታት ፕሮጀክትታትን ተዓዚቡ።

ሚኒስተር ዜና ኤርትራ የማነ ገብረመስቀል ከምዝሓበሮ፡ ናብ ፋብሪካ ዓለባ ዛየርን ኣብ ከባቢ እታ ከተማ ዝርከብ ኣብ ምውዳእ ዘሎ ፕሮጀክት ኣባይቲን በጺሑ። ኣብ ንኡስ-ዞባ ዱባርዋ ዝርከባ ትካላት ኣግሮ-ኢንዱስትሪን ዲጋ ገርገራን'ውን ዑደት ኣካይዱ።

ብሰኑይ ምስ ፕረዚደንት ኢሳይያስ ኣፍወርቂ ብምርኻብ ብዛዕባ ኣብ መንጎ ክልቲኤን ሃገራት ክህሉ ዝኽእል ንግዳዊን ዲፕሎማስያዊን ዝምድና ከምዝተዘራረበ'እቲ ኢጣልያዊ ሚኒስተር ሓቢሩ።

ኣብቲ ኣብ ኣስመራ ዝተገብረ ርክብ፡ ፕረዚደንት ኢሳይያስ፡ እቲ ብመንግስቲ ጥልያን ዝተወስደ ተበግሶ ምስክር ናይቲ ኣብ መንጎ ክልትኣን ሃገራት ዘሎ ታሪኻዊ ክልተኣዊ ምትእስሳር ዘርኢ ምዃኑ ተዛሪቡ።

"ኣብ ፈለማ ናይዚ ዓመት ኣብ ሮማ ኣብ ዝተኻየደ ርክባት፡ በወገን ኤርትራ ናይ ኢጣልያ ድሌት ከምዘሎ ክንርዳእ ክኢልና ነይርና" ክብል ኡርሶ ኣብ ኤክስ (ትዊተር ነበር) ጽሒፉ።

ኣብቲ ምስ ፕረዚደንት ዝተኻየደ ርክብ ኢጣልያውያን ኣውፈርቲ ኣብ ጸዓት፡ ትሕተ ቅርጺ፡ ወደባት፡ ምህርቲ ዓሳ፡ ሕርሻ፡ ንሰደድ ዝዓለመ ፍርያት ፋብሪካ (ማኑፋክቸሪንግ) ከውፍርሉ ዝኽእሉ ዕድል ከምዘሎ ኣቶ ኢሳይያስ ሰፊሕ መብርሂ ከምዝሃበ ተፈሊጡ።

ሚኒስተር ኡርሶ ብወገኑ፡ ተልእኽኡ፡ መቐጸልታ ናይቲ ኣብ ሮማ ዋዕላ ኢጣልያን ኣፍሪቃን፡ ኣብ መንጎ ፕረዚደንት ኢሳይያስ ኣፍወርቅን ቀዳመይቲ ሚኒስተር ጆርጅያ ሜሎኒን ዝተኻየደ ርክብ ምዃኑን ክልቲኤን ሃገራት ብሽርክነት ክሰርሓሉ ዝኽእላ ዓውድታት ከምዘሎን ብምግላጽ፡ ኤርትራ ንዝኸፈተቶ ናይ ወፍሪ ዕድላት ንኢዱ።

“ኩባንያታትና ንዕብየት እዛ ሃገር ኣገዳሲ ኣበርክቶ ክገብራ ይኽእላ እየን” ክብል እውን ተዛሪቡ።

ሚኒስተር ጥዕና ኤርትራ ኣምና ኑርሑሴን ብወገና፡ ኣብ መዳይ ጥዕና ክህሉ ንዝኽእል ምትሕግጋዝ ንምድህሳስ ኣብ ብሕታዊ ትካል ጥዕና ኣጎስቲኖ ጀመሊ ፖሊክሊኒክ ዳይረክተር ቴለመዲስን ዝኾነ ዶ/ር ጋብሪኤለ ሩሚ ተራኺባ።

ኣብቲ ዝርርብ፡ ሚኒስተር ጉዳያት ወጻኢ ኣቶ ዑስማን ሳልሕ ፡ ሚኒስተር ንግድን ኢንዱስትሪን ኣቶ ነስረዲን በኪት፡ ሚኒስተር መጓዓዝያን ቴሌኮምኒኬሺንን ኣቶ ተስፋስላሰ ብርሃነ ከምኡ እውን ኮሚሽነር ባህልን ስፖርትን ኣምባሳደር ዘመደ ተኽለ ዝርከብዎም ላዕለዎት ሰበ-ስልጣን ኤርትራ ተሳቲፎም ነይሮም።

ምንጪ ስእሊ,YEMANE G. MESKEL