ኣብ መንጎ ኤርትራን ኢጣልያን 'ቀጥታዊ ናይ ኣየር ርክብ' ንምጅማር ውጥን ከምዘሎ ተገሊጹ

እተን ኣብቲ ምብጻሕ ዝሳተፋ ዘለዋ ኩባንያት ንግዲ ኢጣልያ ኣብ ትሕተ-ቅርጺ፡ ወደባትን መዓርፎ ነፍርቲን፡ ተሓዳሲ ጸዓት፡ ሕርሻ፡ ከምኡ'ውን ጥዕናን መፍረ-መድሃኒትን ዝህሉ ዕድላት ይድህስሳ ኣለዋ።

ነቲ ባይታ ዘቢጡ ዘሎ ቱሪዚም ኤርትራ ንምብርባር'ውን ተገዳስነት ከምዘለወን እቲ ሚኒስተር ንግዲ ኣብሪሁ።

እቲ ኣብ ዝተፈላለየ ከባቢታት ኤርትራ ዑደት ከካይድ ዝቐነየ ጉጅለ ልኡኽ፡ ብረቡዕ'ውን ናብ ባጽዕ ብምኻድ ነቲ ወደብ ተዓዚቡ።

"ሎሚ፡ ምስ ልኡኽ ዓበይቲ ኩባንያታት ኢጣልያ ብምዃን ናብ ባጽዕ ዘካየድናዮ ምብጻሕ ንዓቕመታት ናይቲ ኣብኡ ዘሎ ትሕተ-ቅርጺ ወደብን መዓርፎ ነፈርትን ክንድህስስ ኣኽኢሉና'ዩ"።

ኣብ ኣብ ሓምለ 2011 ሓንቲ ነፋሪት ጥራይ ዝነበረታ መንገዲ ኣየር ኤርትራ ናብ ሮማ ክልተ ግዜ ኣብ ሰሙን ቀጠታዊ በረራ ጀሚራ ምንባራ ይዝከር። ኣብ 2017 ድማ ናብ ሚላኖ ተወሳኺ በረራ የካይድ ነይሩ።

መንገዲ ኣየር ኤርትራ ካብ እዋን ናጽነት ጀሚሩ ውልዕ ጥፍእ ክብል'ዩ ጸኒሑ።ካብ ናጽነት ክሳብ 2003፡ መንገዲ ኣየር ኤርትራ ብነፈርቲ ዘይኮነ፡ ቤት ጽሕፈት መሸጣ ትኬትን 'ሃንድሊንግ ኤጀንስን' ኮይኑ ክሰርሕ ድሕሪ ምጽናሕ፡ ብ 2003 ወግዓዊ ስራሕ ጀሚሩ።

ናብ ካልእ መስመራት ንምስፋሕ ኣብ እትገብሮ ዝነበረት ፈተነታት ምስ መንገዲ ኣየር ኢጣልያ (ኣል-ኢጣልያ) ናይ ምትሕግጋዝ ስምምዕ ከምዝነበራ'ውን ይንገር።