ኤርትራ፡ ተቐዳደምቲ ምስ ኣፍሪቃውያን ጋንታታት ከይፍርሙ ንምንታይ ተኸልኪሎም?

ኤርትራ ብሕልፊ ብደረጃ ኣፍሪቃ ሓንቲ ካብተን ብዙሓት ተቐዳደምቲ ብሽክለታ እትምልምል ሃገር እያ። እንተዀነ፡ ከምቲ ተኽእሎኣ እቲ ብዝሒ ካብ ዓመት ናብ ዓመት ክስስን ኣይርአን። ብኻልእ መዳይ፡ ካብ ውድድራት ውሽጢ ሃገር ናብ ኣህጉራዊ ኰነ ዓለማዊ መድረኽ ዝሰጋገሩ ተጻወትቲ ብብዝሒ ክርኣዩ ኣይከኣሉን። እቲ ሕቶ ፍሉጥ እዩ፣ ዕቱብን ግሉጽን መልሲ ግና ይደሊ።

ኣብ ኤርትራ፡ ኣብዚ ግዜ'ዚ፡ ቅድድም ብሽክለታ ኣብ ቅድሚት ዝስራዕ ዓይነት ስፖርት'ዩ ኢልካ ምድምዳም ይከኣል።

ኣብ ኣስመራን ካልኦት ከተማታትን ቅድድም ብሽክለታ ንምዕዛብ ጐደናታት ቅጽጽ ክብል ልሙድ ተርእዮ እዩ።

ስለዝዀነ፡ ድሕሪ ናጽነት ኤርትራ ጥራሕ'ኳ እንተ ጸብጺብና፡ ኣብ ልቢ ሰብ ዝሓደሩ ተቐዳደምቲ ሓያሎ እዮም።ካብ ውሽጢ ሃገር ሓሊፎም`ውን፡ ኣብ መላእ ዓለም ኣብ ዘለዉ ውድድራት ተሳቲፎምን ዓወታት ተጓናጺፎምን።

ዳንኤል ተኽለሃይማኖትን መርሃዊ ቅዱስን፡ እቶም ኣብ ዙር ፈረንሳ ክሳተፉ ዝኽኣሉ ቀዳሞት ጸለምቲ ኣፍሪቃውያን ክዀኑ ክኢሉም። ብፋላይ ዳንኤል ኣብቲ እዋን ንኣርባዕተ መዓልታት ማልያ ኣንበሳ ዓቐበት ክውንን ምኽኣሉ፡ ስሙ፡ ስም ሃገሩን ኣፍሪቃን ከጸውዕ ክኢሉ'ዩ።

እዚ ክስተት ኣብ 2015 ዝተጋህደ ኰይኑ፡ እታ ናብ ዙር ፈረንሳ ዘብቅዓቶም ደቡብ ኣፍሪቃዊት ጋንታ፡ ኤምቲኤን ኵቤካ'ያ።

እታ ድሒራ ስማ ናብ ዳይመንሽን ዳታ፡ ዝቐየረትት ጋንታ ንኸም ዳንኤል ተኽለሃይማኖት፡ መርሃዊ ቅዱስ፡ ናትናኤል ብርሃነ፡ ኣማኑኤል ገብረእግዝኣብሄር፡ መትከል እዮብ፡ ፈረቓልሲ ደብሳይ፡ መኽሰብ ደበሳይን ካልኦትን ተቐዳደምቲ ናብ ዝልዓለ ደረጃ ዘበረኸት እያ።

እዛ ጋንታ ኣብ ኤውሮጳዊ ውድድራት ትጻወት ስለ ዝነበረት፡ እቶም ኣብኣ ተሓቚፎም ዝነበሩ ኤርትራውያን ተቐዳደምቲ'ውን፡ ኣብ ኤውሮጳዊ መድረኻት ዓቕሞም ከርእዩ ባብ ተራሕይሎም።

እዚ ጥራሕ ዘይኰነ፡ ካልኦት ኤውሮጳውያን ጋንታታ'ውን ኣብ ኤርትራ ዕቝር ዓቕሚ ተቐዳደምቲ ከም ዘሎ ክስወጠን ስለ ዝጀመረ፡ ራዳራተን ናብ ኤርትራ ከአንፍታ ተገዲደን'የን።

ከም መርኣያኡ ከኣ ብዙሓት ተቐዳደምቲ እንተስ ኣብ ዩሲኣይ ዕድል ትምህርቲ ብምርካብ፣ ወይ`ውን ካልኦት ጋንታታት እናኣፈረማኦም፡ ካብ ኤርትራ ወጻኢ ኣብ ዝርከባ ጋንታታት ናይ ምጽዋት ዕድላት ክረኽቡ ክኢሎም'ዮም።