'ደም ኤርትራውያን ስደተኛታት ይዛሪ ኣሎ' ናይ ዓይኒ ምስክር ቅትለት ኤርትራዊ ስደተኛ ኣብ ኣለምዋጭ

ይዅን'ምበር፡ እዞም ግዳይ መጭወይትን መቕተልትን ዝዀኑ ዘለዉ ስደተኛታት፡ እቲ ቦታ ንስደትኛ ውሑስ ዘይምዃኑን ብተደጋጋሚ'ኳ እንተ ጠርዑ፡ ኣውያቶም ሰማዒ ከም ዝሰኣነ እዮም ብዙሓት ኣብቲ መዓስከር ዝነብሩ ንድሕነቶም ስሞም ዘይንጠቕሶ ኤርትራውያን ስደተኛታት ዝገልጹ።

እቲ ናይ ዓይኒ ምስከር ብወገኑ፡ ኣለምዋጭ ስደተኛ ክነብረሉ ዝኸእል ኣይኰነን ብምባል፡ "ሓደ ሃገር ወይ ከባቢ ንገዛእ ርእሱ ሰላምን ጸጥታን ምስ ዝህሉዎ እዩ ንስደተኛ ከዕቍብን ውሑስ ክኸውንን ዝኸእል። ኣብዚ ቦታ ግን ኣሽንዃይዶ ንዓና ንባዕሎም'ውን ኣብ ኣሸጋሪ ናይ ጸጥታ ኵነታታት እዮም ዘለዉ፡" ብምባል ደም ኤርትራውያን ስደተኛታት፡ "ይዛሪ ኣሎ፡" ይብል።

'በቃ ወዲእና ኢና፣ እዞም ኣብዚ ተሪፍና ዘለና ክንቅተል ኢና እምበር ብህይወት ዝወጽእ የብልናን ኢልና ተስፋ ቈሪጽና ኢና፡' ብምባል እቲ እንኮ ፍታሕ እቶም ስደተኛታት ካብቲ ቦታ ክወጽኡ ጥራሕ ምዃኑ፣ ኵለን ተጣበቕቲ ሰብኣዊ መሰላትን ዝምልከቶም ኣካላትን ጸማም ህዝኒ ከይሃቡ ክረድኡዎም ምሕጽንትኡ የቕርብ።

ካልእ ስሙ ዘይንጠቕሶ ኤርትራዊ ስደተኛ ብወገኑ፡ "ኣብ ዳባት ኤርትራውያን ስደተኛታት ዘሕልፉዎ ዘለዉ መከራ ናይ ክፉእ ክፉእ እዩ፡" ይብል።

"ኣብ ልዕሊ ንጹሃት ኤርትራውያን ዜጋታት ዝግበር ዘሎ ግፍዕታት መዓልቦ ክግበረሉ፡ ብሰላማዊ ሰልፍን ካልእ መንገድታትን ንዝምልከቶም ኣካላት ንምሕታት ተደጋጋሚ ፈተነ ተኻይዱ እዩ፣ ክሳዕ ሕጂ ግን ዝተገብረ ነገር የሎን።"

ቀጺሉ፡ "ሕጂ'ውን እዚ ከምዞም ዝቐደሙ ዝተቐትሉ ኣሕዋትና ተቐቲሉ ዘሎ፡ ጠዋሪ ስድራ ናይ መወዳእታ ከም ዘይከውን ርግጸኛ እየ። ንሓደ ዕቝባ ዝሓተተ ስደትኛ ብኸምዚ ኣገባብ ምቕታል ዘሕዝንን ኢሰብኣውን ክነሱ፡ ዓለም ዝባና ዝሃበትና ምኽንያት እንታይ እዩ?" ይሓትት።

"ክንደይ ኣካሉ ዝጐደለ፡ ዝሰንከለን ዓቕሉ ኣጺቢቡ ናብ ፈቐዶ ሊብያ ሃጽ ዝበለን እውን ኣሎ፡" ብምባል ከም ዝተሓለሉ የረድእ።