ህዝቢ መዳውብቲ ዓድታት ኤርትራን ትግራይን ሎሚ ኣብ ዛላምበሳ ተራኺቡ

ናብቲ ጽምብል ካብ ሰንዓፈ ዝመጽአት ነብያት ወልደገርግስ፡ "እቲ ሎሚ ዝተጀመረ ሰላምን ዕርቅን ጐልቢቱ ከም ዝቕጽል ምሉእ ተስፋ ኣለኒ፡" ትብል።

ኣምለሰት ካብ መረበት ዓዳ ዘላምበሳ ተፈናቒላ ኣብ ዓዲ ግራት ኣብ መዕቈቢ ተመዛበልቲ ንሓሙሽተ ዓመታት ምስ ምሉእ ስድራኣ ተሳቕያ ተሕልፎ ዘላ መከራ ትዝክር።

"ሎሚ ዕጽው ገዛይ ክርእዮ መጺአ ኣለኹ፡ ካብ ደጊም ደቀይ ሒዘ ናብ መሬተይ ተመሊሰ ብምምጻእ ምንባር ክቕጽል እየ፡" ኢላ።

ተዋሲቡ ከም ሓደ ስድራ ይነብር ከም ዝነበረን ደሓር ግን ተፈላልዩ ከም ዝጸንሐን ዝገልጽ ህዝቢ እቲ ከባቢ፡ ተሓቛቝፉ ብምሒር ተሓጓስ ክነብዕ ውዒሉ።

ተወከልቲ ክልቲኡ ህዝቢ፡ ካብ ሎሚ ኣትሒዙ "ሰላምን ዕርቅን ከም ዝወረደ" ብምግላጽ ህዝቢ ዛላምበሳን ጉለመኻዳን ኣብ መረበቱ ተመሊሱ ብሰላም ክነብር፡ ምስ ህዝቢ ኤርትራ እውን ብወግዒ ምርኻቦም ኣበሲሮም።

ይዅን እምበር፡ ተፈናቒሉ ዝነበረ ህዝቢ ዛላምበሳ ናብ መረበቱ ክምለስ እንከሎ ብዙሓት ብደሆታት ከም ዘጓንፍዎ ንምርዳእ ኣየጸግምን።

ኣብታ ከተማ ዝነበሩ መሰረታት ልምዓት ዓንዮም እዮም። ብፍላይ ኣገልግሎት መብራህቲ፡ ስልክን ባንክን ምሉእ ንምሉእ ዓንዩ እዩ።

እዞም መሰረታት ልምዓት ብመንግስቲ ፈደራል ዝውነኑ ብምዃኖም ተጸጊኖም ናብ ኣገልግሎት ክምለሱ ከቢድ ስራሕ ከም ዝሓትት ተዓዘብቲ ይገልጹ።

ዓንዮም ዝነበረሩ ትካላት ማይ፡ ሕክምናን ኣብያተ ትምህርትን ብገበርቲ ሰናይ ጽገና ተገይሩሎምን ይግበረሎም ከም ዘሎን ነበርቲ እታ ከተማ ይገልጹ።

ብሰንኪ'ቲ ኲናት ሕሱም ዝተሳቐየ ህዝቢ ዛላምበሳ ጥሪቱን ንብረቱን ተዘሚቱ፡ ገዛውቱ ተዓጽዩን ዓንዩን ስለ ዝዀነ፡ ናብ ዓዱ ተመሊሱ ንቡር ናብራኡ ከካይድ ኣመና ከቢድ ምዃኑ፡ ቢቢሲ ዘዘራረቦም ነበርቲ ይገልጹ። በዚ ዝምልከቶም ኣካላት ኣብዚ መዳይ ብዙሕ ዝዕመም ዕዮ ገዛ ከም ዘለዎም የዘኻኽሩ።

ጽርግያ ዓዲግራት ዛላምበሳ ስለ ዝተኸፈተ ኣገልግሎት መጓዓዝያ እውን ተጀሚሩ ኣሎ።

ኣብ ዝሓለፈ ሰሙን እውን፡ ኣመሓዳሪ ወረዳ ኢሮብ መምህር እያሱ ምስግና፡ "ኣብ ገለ ከባብታት፡ ብሰራዊት ኤርትራ ተነቢሩ ዝጸነሐ ኬላ ስለ ዝተላዕለ፡ መጓዓዝያ ህዝብን መካይን ገበርቲ ሰናይን ናብቲ ወረዳ ብወግዒ ኣገልግሎት ከም ዝጀመረ ገሊጹ ምንባሩ ይዝከር።

ዶብ ኢትዮጵያን ኤርትራን፡ ቀዳማይ ምኒስትር ኣቢይ ኣሕመድ ብ2018 ዓ.ም ናብ ስልጣን ምስ መጽአ ተኸፊቱ ምንባሩ ይዝከር።

ነዚ ስዒቡ ፖለቲካዊ፡ ማሕበራውን ቍጠባውን ዝምድናታት ክልአተን ሃገራት ምምሕያሕ ከርኢ ጀሚሩ ነይሩ።

እዚ፡ ነዊሕ እንከይጸንሐ ዝተዓጽወ ኰይኑ፡ ሕጂ ኣብ ዶባት ዝነብሩ ህዝብታት ክራኸቡ ከም ዝጀመሩ ይግለጽ ኣሎ።