ኣስመራ፡ ፍሉይ ልኡኽ ስዊዘርላንድ ኣብ ኤርትራ ምብጻሕ የካይድ ኣሎ

ፍሉይ ልኡኽ ስዊዘርላንድ ኣብ ቀርኒ ኣፍሪቃ ኣብ ኤርትራ ምብጻሕ የካይድ ኣሎ። ኣብዚ ቀረባ መዓልታት ናብ ኣስመራ ዝኣተወ ኣምባሳደር ሲልቨይን ኣስቴር ምስ ሚኒስተር ጉዳያት ወጻኢ ዑስማን ሳልሕ ዝርከቦም ላዕለዎት ሰበስልጣን ኤርትራ ብምርኻብ ተዘራሪቡ'ሎ።

ምብጻሕ ናይቲ ፍሉይ ልኡኽ፡ ሃገሩ ምስ ኤርትራውያን ስደተኛታት ብዝተሓሓዝ ንኤርትራ ትህቦ ዝነበረት ደገፍ ደው ከተብሎ ድሕሪ ምውሳና'ዩ ዝካየድ ዘሎ።

ስዊዘርላንድ፡ እቶም ብዝተፈላለየ መገዲ ናብታ ሃገር ብምእታው ሕቶ ዕቝባ ኣቕሪቦም ዝተነጽጕ ኤርትራውያን ናብ ሃገሮም ንክምለሱ ኤርትራ ክትቅበሎም ፍቓደኛ ብዘይምዃናን እያ "ልምዓታዊ ሓገዝ" ከተቋርጽ ተገዲዳ ዘላ።

ኣብ ዝሓለፈ ሰነ 2024፡ ስዊዘርላንድ ምስ ኤርትራ ኣብዚ ጉዳይ ንምዝርራብ ሓደ ልኡኽ ናብቲ ዞባ ክትልእኽ ምዃና ኣፍሊጣ ምንባራ ይዝከር።

እቲ ኣብ ዝሓለፈ ሰሙን ናብ ኢትዮጵያን ሱዳንን ዝበጽሐ ፍሉይ ልኡኽ ኣብ ኤክስ ኣብ ዘውጽኦ ሓበሬታ፡ ምስቶም ሰበስልጣን ኣብ ዘካየዶ ርክብ ግን ብዛዕባ ጉዳይ ኤርትራውያን ስደተኛታት ምዝርራቡ ኣይጠቐሰን።

"ብዛዕባ ዞባዊ ምዕባለታት ምስ ሚኒስተር ጉዳያት ወጻኢ ኤርትራ ርእይቶታት ምልውዋጠይ ክብሪ ይስማዓኒ። ኤርትራ ኣብ ቀርኒ ኣፍሪቃ ዓንዲ ምርግጋእ ኮይና ኣላ" ይብል እቲ ዲፕሎማት።

ብወገን ኤርትራ ግን ብዛዕባ ምብጻሕ ናይቲ ፍሉይ ልኡኽ ይኹን ምስ ሰብመዚ እታ ሃገር ዝገበሮ ርክባት ዝተባህለ የለን።