ናብ ኣስመራን ኣዲስ ኣበባን ኣብ ሓደ እዋን ዝበጽሑ መራሕቲ ሱዳን

ቅድሚ ክልተ ሰሙን፡ ፍሉይ ልኡኽ ዋና ጸሓፊ ሕቡራት ሃገራት ኣብ ጉዳይ ሱዳን ራምታነ ላማምራ ናብ ኣስመራ ብምጻሕ ምስ ፕረዚደንት ኢሳይያስ ተላዚቡ ምንባሩ ይዝከር።

"ፕረዚደንት [ኢሳይያስ] ኣፍወርቂ ነቲ ብሕቡራት ሃገራት ዝምራሕ ዘሎ ጸዕርታት ዘለዎ ደገፍ ደጊሙ ኣረጋጊጹ" ክብል ላማምራ ድሕሪ'ቲ ኣብ ኣስመራ ዘካየዶ ርክብ ኣብ ኤክስ ጽሒፉ ነይሩ።

ኣብ መወዳእታ ወርሒ ሓምለ መንግስቲ ኤርትራ ነቲ ኣብ ኣስመራ ዝነበረ ላዕለዋይ ወኪል ሱዳን ኣብ ውሽጢ 72 ሰዓታት ካብታ ሃገር ክወጽእ ኣዚዙ ምንባሩ ይዝከር።

ኣስመራ ስለምንታይ ነቲ ስጉምቲ ክትወስድ ከምዝተገደደት'ኳ ክሳብ ሎሚ ብወግዒ ዝተገልጸ እንተዘይሃለወ፡ ምስቲ ኣብ ሱዳን ተፈጢሩ ዘሎ ኩነታት ብዝተሓሓዝ ከይኮነ ከምዘይተርፍ ይንገር። መንግስቲ ሱዳን ኣብቲ እዋን መብርሂ ሓቲቱ ነይሩ'ዩ።

ኣብ ዝሓለፈ ወርሒ ሓምለ፡ ቀዳማይ ሚኒስተር ኢትዮጵያ ኣቢይ ኣሕመድ ናብታ ርእሰከተማ ሰራዊት ሱዳን ተቐዪራ ዘላ ፖርት ሱዳን ብምብጻሕ ምስ ጀነራል ኣል-ቡርሃን ተራኺቡ ነይሩ።

ብኻልእ ወገን፡ ጀነራል ኣል-ቡርሃን ኣብ ዝተፈላለዩ ከባቢታት ማእከላት ሰብኣዊ ረዲኤት ክምስርቱ ምፍቃዱ ሕቡራት ሃገራት ንኢዱ።

እቲ ጀነራል ትማሊ ብኤክስ ኣብ ዝሃቦ ሓበሬታ፡ ኣብ ኢል-ኦብየድ፡ ካዱግሊን ኣደ-ዳማዚንን ማእከላት ቀረብ ከቑሙን፡ "ሰራሕተኛታት ሕቡራት ሃገራት ንቃፍላያት ረዲኤት ብምስናይ ኣብ ምዕዳል ሓገዝ ክቆጻጸሩን ክፍቀደሎምን" ምዃኑ ኣፍሊጡ'ሎ።

ኣብ ርእሲ'ዚ፡ ትማሊ ሰኑይ ብተሓጋጋዚ ዋና-ጸሓፊ ሕቡራት ሃገራት ንሰብኣዊ ጉዳያት ቶም ፍለቸር ዝምራሕ ጉጅለ ምስ ምኽትል ሓለቓ-ስታፍ ሰራዊት ሱዳን ጀነራል ኢብራሂም ጃብር ኣብ ፖርት ሱዳን ብምርኻብ ብዛዕባ ምብጻሕ ህጹጽ ረዲኤትን ጸጥታዊ ውሕስነትን ከምዝተዘራረበ ኣገልግሎት ዜና ሱዳን፡ ሱና ጸብጺቡ።