ተደራራቢ ሕማምን ባህሊን ዘይዓገታ ኤርትራዊት ተወዳዳሪት ቅርጺ ሰብነት - ስምረት ርእሶም

ውረድ ደይብ ዝምልኦ ጕዕዞ ሂወት እያ ኣሕሊፋ። እታ ኤርትራዊት ጓል ኣንስተይቲ ብሰንኪ ጸገማት ጥዕና፡ ክሳብ ምስ ምስ ሞት ተፋጢጥጣ ብእምነትን ሓቦን፡ ንዅሉ ሰጊራ እያ ሕልምታታት ዘግሃደት።

ስምረት ርእሶም ኣብ ኤርትራ ተወሊዳ ዓብያ። ኣቦኣ ኣብ ኣመሪካ ብምንባሩ፡ ካብ ኣደኣ ተፈልያ ናብ ኣመሪካ ክትከይድ ምዃና ምስ ተነግራ ነታ ጓል 13 ዓመት ስምረት ኣመና ከበዳ።

ፈለማ፡ “ካብ ኣደይ ተፈልየ ኣይከይድን እየ ወይ ድማ ሃጽ ኢለ ክጠፍእ እየ” ብምባል ኣበየት። ይዅን እምበር “ዓባያ ኣብዚኣ እንተተሪፍኪ ከመርዕወኪ እየ እንተዘይኰይኑ ናብ ኣቦኺ ኪዲ” ምስ በለታ ንኽትከይድ ከምዝተቐሰበት ተዘንቱ።

በዚ ድማ ምስ ሓፍታ ናብ ወላዲአን ናብ ሃገረ ኣመሪካ ኣምሪሐን ሓድሽ ህይወት ኣብ ሃገረ ስደተን ጀመራ። እቲ ክውንነት ድማ ካብቲ ብኣጋኡ ዝገመተቶ ከቢድን ናፍቘቱ ድማ ሕልፊ ኰይኑ እዩ ጸኒሑወን።ንሳን ሓፍታን ምስ ኣመሪካውያን ስድራቤት ክዓብያ ጀመራ።

እዚ ንህይወተን ብመጠኑ'ኳ እንተቃለሎ ነተን ብኤርትራዊ ባህሊ ዝዓበያ ኣሓት፡ ኣብታ ኣመሪካዊት ስድራ ተሓቚፈን ክወሃሃዳን፡ ነቲ ፍልልይ ቋንቋን ባህሊን ክለምዳኦ ቀሊል ኣይነበረን።

“ኣብ እዋን ግርዝውና እሞ ድማ ኣብ ኣመሪካ ምስ ወለድኻ ዘይኰኑ ስድራቤት ምዕባይ ኣዝዩ ከቢድ እዩ፤ ግን ኣምላኽ ይመስገን ኣዝዮም ጥዑማት ስድራ እዮም ነይሮምና። ብዙሕ ሓገዝን ምክንኻንን ብምግባር ብግቡእ እዮም ኣዕብዮምና” ብምባል ነቶም ጸዓዱ ስድራቤታ ዘለዋ ክብሪን ምስጋናን ብምግላጽ ክሳብ ሎሚ ማዕረ ናብ ኤርትራ ሓቢሮምዋ ብምኻድ ጽቡቕ ስድራቤታዊ ርክብ ከምዘለዎም ትጠቅስ።

ስምረት ገና ካብ ኤርትራ ካብ ዝወጻትሉ ግዜ ኣትሒዙ ጸገም ኮላሊት ስለዝነበራ፡ ኣብ ኣመሪካ እውን ብዙሕ ብጥዕና ትሽገር ነይራ። ብሰንኪ እቲ ሕማም ድማ ሸውዓተ ግዜ መጥባሕቲ ገበረት።

እዚ ድማ ንዅሉ ኣካዳምያዊ ንጥፈታታ ክኾላልፎ ስለዝጀመረ፡ ሕጽረት ቋንቋ'ውን ተወሲኽዎ ካልኣይ ደረጃ ኣብ ዝዛዘመትሉ ናብ ኮለጅ ክትኣቱ ኣይከኣለትን።ይዅን እምበር እቲ ኵሉ ራእታታ ብሕማም ምኽንያት ክተዓናቐፍ ኣይፈቀደትን።

ስለዚ ናብቲ ዝንባለኣ ዝነበረ ኣድሂባ ብዓውዲ ጽባቐን ጸጕሪ ርእስን ተመሪቓ። ናታ ትካል ብምኽፋት ንዓሰርተ ክልተ ዓመት ሰርሐት። ጐድኒ ጐድኑ ድማ እቲ ክምሃር ኣለኒ ዝብል ድሌት ውሽጣ ስለዝደፋፍኣ ናብ ትምህርቲ ተመሊሳ ነርሲን ከተጽንዕ ጀመረት።

ሽዑ'ውን ንስርዓተ መትንታት ብዘጥቅዕ ሕማም 'Guillain barre syndrome' ተጠቒዓ ዳርጋ ንሞት ምስ ተቓረበት ትምህርታ ኣቋረጸት።

“ሃንደበት ከምዚ ሰዓል ዝመስል ኢሉ ምስ ጀመረኒ ኣብ ሰሙኑ ፓራላይዝ ኰይነ ንነብሰይ ኣብ ክፍሊ ህጹጽ ረዲኤት ምስ ረኸብኩዋ ክመውት እየ ዝኸውን ኢለ ነይረ። ግን ስፖርት ክሰርሕ ውዒለ፣ ተጸሊኡኒ ኢለ ባዕለይ መኪና ዘዊረ ዝመጸኹ ሰብ ከመይ ገይረ ፓራላይዝ ይኸውን ብምባል በቃ ነቲ ኣተሓሳስባይ ክቕይሮ ኣለኒ ኢለ፡” ትብል።

ስምረት ነቲ ኣብ ሞት በጺሓትሉ ዝነበረት ኣጋጣሚ “ኣምላኽ ንኽነብር ዕድል ሂቡኒ ኣሎ” ብምባል ንዅሉ እቲ ሓካይም “ፓራላይዝ ክትኰኒ ኢኺ፣ ብ ዊልቸር ኢኺ ክትንቀሳቐሲ” ዝብልዋ ዝነበሩ ገዲፋ “ኣነ ክሓዊ እየ። ተወዳዲረ ዋንጫ ከምጽእ እየ” ብምባል ትምልሰሎም ከምዝነበረት ተዘንቱ።

ኣብቲ እዋን እቲ ክበጽሓዋ ዝመጹ ሰባት ይዅኑ መሓዙታ እቲ ንሳ ብኣፋ እተውጽኦ ተስፋ ዝመልኦ ብእወታዊ ኣተሓሳስባ ዝተደረኸ ዘረባን፡ እቲ ዝነበረቶ ኵነታትን ዘይራኸብ ብምንባሩ፡ “እዚኣስ ሓሚማ እያ” ዝበላ መሓዙት ከምዝነበራኣ ትዝክር። ስምረት ግን ተስፋ ኣይቈረጸትን።

ድሕሪ ዝተወሰነ እዋን ቅሩብ ምስ ተመሓየሸት፡ ብዊልቸር ተጸይራ ንበይና ክትከውን ስለዘይትኽእል ምስታ ዘዕበየታ ኣመሪካዊት ኣደኣ ክትነብርን ጥዕናኣ ክትከታትልን ጀመረት። ሽዑ'ውን ንኣደኣ እቲ እወታዊ ሓይሊ እምነታ ደጋጊማ “ ማም! ኣነ ስፖርት ሰሪሐ ዋንጫ ክሽለም እየ፤ ከዅርዓኪ እየ ይብላ ነይረ” ትብል።

በዚ ኵሉን ጥዕናዊ መሰናኽል ግን ሽዑ'ውን እቲ ሰባት ናይ ምሕጋዝ ባህጋ መልክዑ ቀይሩ እምበር ኣይሃሰሰን። ብዘይካኡ'ውን ኣብ ኤርትራ ንዝርከቡ ስድራኣ ክትሕግዝ እንተዀይና ወፊራ ክትኣቱ ነይርዋ።

“ከም ኵሉ ኤርትራዊ ስድራውን ክትሕግዝ ስለዘለካ ደቂ ሰይቲ ስዉእ ሓፍተይ እውን ክኣሊ ነይሩኒ። ኮታስ ንነብስኻ ጥራይ ምንባር ትርጕም የብሉን ኢለ ዝመጸ ይምጸእ ኣብ ሂወት ተስፋ ኣይቈርጽን እየ።”