ኤርትራ፡ 'ብዓይነቱ ፍሉይ' ማእሰርቲ ወንጌላውያን ኣመንቲ ይፍጸም ኣሎ

ሰብመዚ ጸጥታ ኤርትራ ኣብ ልዕሊ ሰዓብቲ ናይተን ዝተኣገዳ ወንጌላውያን ኣብያተ-ክርስትያን ከካይድዎ ዝጸንሑ ማእሰርቲ ይቕጽልዎ ከምዘለዉ ተሓለቕቲ ሓቢሮም።

እቶም ኣብዚ ወርሒ'ዚ ኣብ ዞባታት ሰሜናዊ ቀይሕ ባሕሪ፡ ዓንሰባን ጋሽ-ባርካን ኣብ ቀይዲ ዝኣተዉ ሰባት ካብ ገዛውቶም ዝተወስዱ ምዃኖም እቲ ሓበሬታ ይጠቅስ።

ሓደ ንመሰላት እቶም ዝሳደዱን ዝእሰሩን ዘለዉ ኣመንቲ ዝጣበቕ ተሓላቒ እቲ ብፍላይ ኣብ ዞባታት ዝካየድ ዘሎ ሓድሽ ወፍሪ ማእሰርቲ "ብዓይነቱ ፍሉይ ዝመስል" ኮይኑ ዝያዳ "ንኣገልገልቲ" ዒላማ ዝገበረ ምዃኑ ንቢቢሲ ሓቢሩ።

ኣብ ዝሓለፈ ወርሒ'ውን ኣብ ከተማታት ተሰነይ፡ ኣቚርደትን ባረንቱን ብዓሰርተታት ዝቑጸሩ ሰዓብቲ እተን ኣብያተ-ክርስትያን ኣብ ቀይዲ ኣትዮም ነይሮም።

ልዕሊ 60 ካብቶም ኣብ ዞባ ጋሽ-ባርካ ዝተኣሰሩ ሰባት ኣብ ቢንቢና ኣብ ዝተኸፍተ ሓድሽ መዳጐኒ ተታሒዞም ከምዘለዉ እቶም ተሓለቕቲ ገሊጾም።

ኣብቲ ዝቐጸለ ናይ ምእሳር ስርሒታት ኣብ ከተማታት ዓዲ-ተከሌዛን፡ ከረን፡ ጋሕቴላይን ከምዝተፈጸመ እቶም ምንጭታት ጠቒሶም።

ኣብ ኤርትራ ብኣማኢት ዝቑጸሩ ሰባት ብሰንኪ ሃይማኖታዊ እምነቶም ኣብ ዝተፈላለዩ ኣብያተ ማእሰርቲ ተዳጒኖም ከምዝርከቡ ይግለጽ።

ነቲ ኣብዚ ወርሒ'ዚ ዝተኻየደ ማእሰርቲ ዘረጋገጸ ዳይረክተር ተሓላቒ መሰላት ወንጌላውያን ኣመንቲ ዝኾነ 'ረሊዝ ኤርትራ' ከምዝበሎ፡ ቁጽሪ ኣብታ ሃገር ዘሎ ዘይወግዓዊ ኣብያተ-ማእሰርቲ ብዙሕ ብምዃኑ ክንደይ ሰብ ብእምነቶም ኣብ ቀይዲ ከምዝኣተዉ ንምፍላጥ ኣጸጋሚ ምዃኑ ንቢቢሲ ገሊጹ።

ዶክተር ብርሃነ ኣስመላሽ ከምዝበሎ፡ "ኹነታት ኣመንቲ ወንጌላውያን ኣብዚ ዝሓለፈ 20 ዓመት ምንም ከምዘይተመሓየሸ 'ዩ ዝፍለጥ። እቶም ቀዳሞት ዝተኣስሩ መራሕቲ ሕጂ 20 ዓመቶም መሊኦም ኣለዉ" ክብል ቅድሚ ሒደት ሳምንታት ንቢቢሲ ተዛሪቡ ነይሩ።

"ንዋላሓደ ክሲ ዝተመስረተሉ ወይ ናይ ቤትፍርዲ ኣገባብ ዝተኻየደሉ ሰብ የለን" ይብል ዶክተር ብርሃነ።

ሰብመዚ ኤርትራ ብዛዕባ ብዘይሕጋዊ ኣገባብ ኣብ ቀይዲ ዘእትውዎም ዜጋታት ውግዓዊ መግለጺ ይኹን ሓበሬታ ኣይህቡን'ዮም። መብዛሕትኡ እዋን'ውን ቤተሰቦ ክበጽሕዎም ኣየፍቅዱን እዮም።

ሕቡራት ሃገራት ኣብ ዝሓለፈ ወርሒ ለካቲት ኣብ ዘቕረቦ መጽዋዕታ፡ ሰብመዚ ኤርትራ ንኹሎም እቶም ብዘይሕጋዊ ኣገባብ ኣብ ቀይዲ ድሕሪ ምእታዎም ዝሰወርዎም ሰባት ክፈትሕዎም፡ ኣበይ ከምዘለዉ፡ ብዛዕባ ሃለዋቶም፡ ከምኡ'ውን ኩነታት ጥዕንኦም ክሕብሩን ሓቲቱ ነይሩ።

ምክትል ዋና ጸሓፊ ሕቡራት ሃገራት ንጉዳያት ሰባዊ መሰላት ኢልዝ ብራንድስ ከህሪስ፡ ኣብ ዝሓለፈ ለካቲት ኣብ ጀነቫ ስዊዘርላንድ ኣብ ዝተኻየደ ኣኼባ ኣብ ዝሃበቶ መግለጺ፡ ኣብ ኤርትራ "ስቅያትን ዘይሕጋዊ ማእሰርትን" ይቕጽል ኣሎ ክትብል ተዛሪባ ነይራ።

"ማእሰርትን ግዱድ ምስዋርን ኣሽሓት መራሕቲን ኣባላትን ጉጅለታት ሃይማኖት፡ ተሓለቕቲ፡ ጋዜጠኛታትን ካብ ገደብ-ኣልቦ ወተሃደራዊ ሃገራዊ ኣገልግሎት ዝሃደሙን" ከምዘሎ'ውን እታ ላዕለወይቲ ብዓልቲ ስልጣን ጠቒሳ።

ሰብመዚ ኤርትራ ግን እቲ ጸብጻባት ንክውንነት እታ ሃገር ኣብ ግምት ዘየእቱ "ፖለቲካዊ ሃቐነ ዘለዎን ዘይሓላፍነታውን ክስታት" ብምባል'ዮም ንዝቐርበሎም ክስታት ዝነጽግዎ።