ኦሎምፒክ ፓሪስ፡ ዓይኒ ብዙሓት ስሒቦም ዘለዉ ሽዱሽተ ኣፍሪቃውያን ኣትሌታት

ፈይዝ ኪፕዮንጎ [ኬንያ፡ ጎያይት]

ፈይዝ ኣብ ዝሓለፈ 13 ኣዋርሕ ጥራይ ኣርባዕተ ሓደሽቲ ክብረ ወሰን ከተመዝግብ ዝኸኣለት ድንቂ ኣትሌት’ያ።

እዛ ጓል 30 ዓመት ኬንያዊት ጎያይት ኣብ 1500 ሜትሮ ኣብ ዝሓለፈ ክልተ ኦሎምፒካት ወርቂ መዳልያ ክትረክብ ክኢላ’ያ ሕጂ ከኣ ኣብ ሰለስተ ተኸታተልቲ ውድድራት ኦሎምፒክ ወርቂ ንኽትዓትር’ዩ ሕልማ።

ፈይዝ ኣብ መጀመርታ ዝሓለፈ ወርሒ ኣብ ፓሪስ ኣብ ዝተኻየደ ውድድር ዳይመንድ ሊግ ኣብ 1500 ሜትሮ ሓዲሽ ክብረ ወሰን ከተመዝገብ ክኢላ’ያ።

ብፈይዝ ብዘይካ ኣብ 1500 ሜትሮ ኣብ 5000 ሜትሮ’ውን ክትወዳደር’ያ።

ለትሲል ተቦጎ [ቦትስዋን፡ ጎያዪ]

ለትሲለ እቲ እንኮ ን100 ሜትሮ ብትሕቲ 10 ካልኢት ክውድኣ ዝኸኣለ ቦትስዋናዊ ጎያያይ’ዩ።

ኣብ ዝሓለፈ ዓመት ኣብ ዝተኻየደ ቻምፕዮና ዓለም ንሃገሩ ወኪሉ ኣብ ዝተወዳደረሉ ከኣ ክልተ ሜዳልያታት ክረክብ ክኢሉ።

ኣብ 100 ሜትሮ ብሩር ኣብ 200 ሜትሮ ከኣ ነሓስ መዳልያ ተዓዊቱ፡ እዚ ከኣ እቲ ቀዳማይ ኣፍሪቃዊ ኣብ ቻምፕዮና ዓለም ኣብ ሓጺር ርሕቐት ክልተ መዳልያታት ዝረኸበ ኣስምየዎ።

ወዲ 21 ዓመት ለትሲለ ተቦጎ ዋላ ድኣ ዝፈትዋ ኣዲኡ ኣብ ዝሓለፈ ወርሒ ግንቦት ትፈለዮ’ምበረ ንኹሉ ክኢሉ ዓመት ከመዝግብ ከምዝኽል ብዙሓት ትጽቢት ይገብርሉ።

ፍራንክሊን ፍረደሪክ ኣብ 1996 ኣብ ሓጺር ርሕቀት ኣብ ኦሎምፒክ ተዓዊቱ ነይሩ’ዩ፡ ብድሕሪኡ ግን ዝኾነ ኣፍሪቃዊ ኣብ ኦሎምፒክ ነዚ ዓወት እዚ ክበጽሖ ኣይክኣለን፡ ለትሲለ ነዚ ን28 ዓመታት ዘይተደፈረ ክብረ ወሰን ኣብ 100 ከምኡ ከኣ 200 ሜትሮ መዳልያ ብምውሳድ ክሰብሮ ይኽእል’ዩ።

ብለሲንግ ኦቦሩዱዱ [ናይጀርያ፡ ረስትሊንግ]

ብለሲንግ ኦቦሩዱዱ ኣብ ውድድር ረስትሊንግ ክንድኣ ዓወታትተ ዝተጎናጸፈ ኣፍሪቃዊ የለን።

14 ግዜ ቻምፕዮን ኣፍሪቃ ክትከውን እንከላ፡ ኣብ ውድድራት ኮመንዌልዝ ከኣ ኣርባዕተ መዳልያታት ተዓዊታ።

ቅድሚ ሰለስተ ዓመታት ኣብ ዝተኻየደ ኦሎምፒክ ቶክዮ ኣብ ናይ 68 ኪሎ ብሩር መዳልያ ክትዕወት ክኢላ’ያ።

እዛ ካብ 2009 ጀሚራ ኣብዚ ውድድር ተጸሚዳ ትርከብ ብለሲንግ፡ ኣብ ፓሪስ ኦሎምፒክ ደሚቖም ክውጽኡ ካብ ዝኽእሉ ኣፍሪቃውያን’ያ ትስራዕ።

ሁገስ ፋብሪስ ዛንጎ [ቡርኪና ፋሶ፡ ኣትሌት]

ወዲ 31 ዓመት ሁገር፡ ንቡርኪናፋሶ እቲ ናይ መጀመርረታ ነሓስ መዳልያ ከምጽኣላ ዝከኣለ ኣትሌት’ዩ።

ሁገር ኣብ ዝሓለፈ ዓመት ኣብ ቡዳፔስት ሃንጋሪ ኣብ ዝተኻየደ ዝላ 17.64 ሜትሪ ብምዝላል ቻምፕዮና ዓለም ብምዃን ንሃገሩ ኣብ ቻምፕዮና ዓለም ስማ ከምዝደምቕ ገይሩ’ዩ።

ናብ ሃገሩ ኣብ ዝተመለሰሉ ኣብ ርእሰ ከተማ ኦጓዱጉ ኣዝዩ ምዕሩግ ኣቐባብላ’ዩ ተገይርሉ።

እዚ ብትምህርቲ’ውን ሰናፍ ዘይኮነ ሁገር ብዓውዲ ምህንድስና ናይ ዶክተርይት ማዕረግ ኣለዎ፡ ኣብ ፓሪስ ዓወት ብምምዝጋብ ከኣ ሽሙን ሽም ሃገሩን ከጸውዕ ትጽቢት ኣሎ።

ፋቲማ ዛህራ ኢል ማሞኒ [ሞሮኮ፡ ሳዕሳዒት]

ፋቲማ ብዝያዳ ባሪ ቢ ገርለስ ኢል ማሚኒ ዝብል ስም’ያ ትፍለጥ፡ ንሳን ሃገራ ሞሮኮን ኣብ ኣፍሪቃ እተን ንመጀመርታ ብሳዕስዒት ‘ብሬክ’ ኣብ ኦሎምፒክ ክሳተፋ ዝኸኣላ ኮይነን ኣለዋ።

ሳዕስዒት ብሬክ ከም ስፖርት ንመጀርታ ግዜ’ዩ ኣብ ፓሪስ ኦሎምፒክ ዝኣቱ ዘሎ፡ ቅድሚ ሕጂ ከም ስፖርት ኮይኑ ንውድድር ኣይኣቱን’ዩ ነይሩ።

ጓል 24 ዓመት ፋቲማ ኣብ ጎደናታት ሞሮኮ፡ ራባት ምርኢት ከተርኢ እንከላ ብስደራኣ ብዙሕ ተቐባልነት ኣይነበራን። ምስ ግዜ ግን ንዕኡ በዲሃ፡ ተኣሚንላስ ንሃገራ ወኪላ ኣብ ኦሎምፒክ ክትወሳተፍ በቒዓ። መዳልያ ክትረክብ ከምእትኽል ከኣ ብዙሓት ግምት ሂቦመና ኣለዉ።