ኣብ ማእከል ባሕሪ ኣብ ኣፍ ሞት ዝርከቡ ኤርትራውያንን ተጋሩን ስደተኛታት ህጹጽ ረዲኤት ይሓቱ

ኣብ ማእከላይ ባሕሪ ኣብ ሓደገኛ ኩነታት ዝርከቡ ቆልዑን ደቂኣንስትዮን ዝርከብዎም ኤርትራውያንን ኢትዮጵያውያን ስደተኛታት ህጹጽ ረዲኤት ሓቲቶም። እቶም ካብ ሊቢያ ክሰግሩ ሓደጋ ምግልባጥ ጃልባ ዘጋጠሞም 32 ውጻእ-መዓት ዝኾኑ ስደተኛታት፡ ኣብቲ ኣብ ማእከል ባሕሪ ዝርከብ መደበር ጋዝ'ዮም ተዓቚቦም ዘለዉ። "ኣብ መላእ ዓለም ትርከቡ ሰማዕቲ ትግርኛ ኣሕዋትና፡ ኣብዚ ንሕና ብጥምየትን መከራን ቁርን ንመውት ኣለና" ክብሉ ብቪድዮ ኣብ ዝሰደድዎ መልእኽቲ ተማሕጺኖም።

"በጃኹም ሓጉዝና፡ ርድኡና፡ ኣብ ዝተወሰነ ሰዓት እንተዘይተረዲእና፡ ኣንሕና ክንመውት ኢና ፍሉጥ'ዩ" ክብል ይስማዕ ሓደ ካብኦም ኣብቲ ዝተዘርግሐ ቪድዮ።

ኣብ ማእከላይ ባሕሪ ኣብ ሓደጋ ንዝወደቑ ስደተኛታት ኣብ ምድሓን ዝተዋፈረ ሓደ ማሕበር ግብረሰናይ ኣብ ዘውጽኦ ሓበሬታ፡ ሓደ ካብኦም ድሮ ሞይቱ ከምዘሎን እቶም ንስክላ ካብ ሞት ዝደሓኑ'ውን ብኽቱር ጥምየትን ቀዝሒን ተሰኒፎም ከምዘለዉ ይጠቅስ።

"ሓደ ካብኦም ድሮ ሞይቱ'ሎ፡ ዝበዝሑ ድማ ሓሚሞም ኣለዉ፡ ማይ ይኹን መግቢ የብሎምን፡ ንህቦብላ ባሕሪ ዝተቓልዑ'ዮም። ተወሳኺ ግዜ ከነጥፍእ የብልናን" ክብል ሰብመዚ ኣውሮጳ ህጹጽ ደገፍ ብምግባር ንምደሓኖም ክጓየዩ ጸዊዑ።

ሰራዊት ቱኒዝያ ንከምዚኦም ዝመሰሉ ኣብ ሓደጋ ዝወደቑ ስደተኛታት ህጹጽ ሓገዝ ከምዘይገብር ዝነቐፈ እቲ 'መዲተራንያ ምድሓን ሰባት' ዝተባህለ ማሕበር፡ እቶም ስደተኛታት ናብ ቱኒዝያ ከይጥረዙ ተማሕጺኑ'ሎ።

"በጃኹም ሓጉዝና፡ ብጥምየትን ብቑርን ንመውት ኣለና፡ ረአዩዋ፡ ኣሕዋትና ብጥምየት ሞይቶም፡ ብቑሪ ሞይቶም፡ መዓት ሰብ. . ." ይብል እቲ ናይ ርድኡና መልእኽቲ።

እቲ ብዓቢ ትካል ነዳዲን ጋዝን ብሪጣንያ (ብሪቲሽ ፐትሮልዮም) ዝውነን 'ሚስካር ኦይል ፕላትፎርም' (Miskar Oil Platform) ተባሂሉ ዝጽዋዕ መደበር፡ ኣብ ማእከላይ መዲተራንያን፡ ኣብ መንጎ ቲኒዝያን ኢጣልያዊት ደሴት ላምፐዱዛን ዝርከብ'ዩ።

"ካብ ሊብያ ዝሃደሙ ቆልዑ፡ ደቂኣንስትዮን ደቂተባዕትዮን ኣብ ሚስካር መደበር ነዳዲ ምስበጽሑ ሓደጋ ምግልባጥ ጃልባ ኣጋጢምዎም ንኣርባዕተ መዓልታት" ሓዲግ ከምዝተረፉ እቲ ማሕበር ይጠቅስ።

መሸፈኒ ዘይብሉ ብምዃኑ ድማ እቶም ስደተኛታት ንንፋስ፡ ቁሪ፡ ዝናብን ጸሓይን ዝተቓልዑ'ዮም።

ብሰንበትን ትማሊ ሰኑይን ሓንቲ ሲቪላዊት ነፋሪት ኣብ ልዕሊኦም እናዘንበየት ትከታተሎም ምንባራ ካልእ ኣብ ምድሓን ስደተኛታት ዝተዋፈረ 'ሲ ዎች ኢንተርናሽናል' ዝተባህለ ማሕበር ሓቢሩ።

እቲ ዘለውዎ ቦታ ደገፍ ዝረኽብሉ ብዘይምዃኑ፡ ሰብመዚ ኣውሮጳ ህጹጽ ደገፍ ክገብርሎም ጸዊዑ።