ኣብ መዓስከር ኤርትራውያን ስደተኛታት ኣለምዋጭ ብዝተፈጸመ መጥቃዕቲ ሓደ ሰብ ተቐቲሉ ብዙሓት ቈሲሎም

ካብቶም ብጥይት ዝተሃርሙ፡ እቲ ሓደ ኣብ ከባቢ መቐመጫኡ ዝኣተወት ጥይት ገና ኣይወጸትን ስለዘላ፡ ብኸቢድ ይሳቐ ከምዘሎ ግርማይ የረድኣ።

ኣተሓሒዙ፡ “ምስቶም ዝተሃርሙ ንናብይ ዘለና ሰባት፡ ኣብዚ ሆስፒታል ምሳና ዝሰዓቡ፡ በዝን በትን ኰይኖም ኣጆኹም ዝብሉና ብዙሓት እዮም" ክብል ነቲ ዘለዎም ምትሕብባር የረድእ።

ንሱ፡ ብፍላይ ድሕሪ’ቲ ቀዳም ዘጋጠመ ኵነታት፡ እተን ብስደተኛታት ብባዕላቶም ዝካየዳ ጕጅለታት ሓለዋ፡ ነቲ ብዞናት ዝተኸፋፈለ መዓስከር ብዝከኣል መጠን ባዕላተን ከም ዝሕልዋ ብምግላጽ፡ እቶም ዕጡቓት ግን ብረታት ይዅን ካራሩ ኣጢቘም ደይ መደይ ኢሎም ስለዝመጹ፡ ከምቲ ሰኑይ ምሸት ዘጋጠመ ከቢድ ሓደጋ ከምዘውርዱሎም ኣረዲኡ።

ኣብ ውሽጢ እቲ መዓስከር ይዅን ኣብ መገዲ - ካብቲ መዓስከር ናብ ከተማ ዳባት ኣብ ዝወስድ መገዲ፡ ቀጻሊ ክትራን፡ መችወይቲ፡ ስርቂ፡ ዓመጽን ቅትለትን ከጋጥም ከም ዝጸንሐ ብተደጋጋሚ ክንገር ጸኒሑ እዩ።

እቲ መዓስከርን ከባቢኡን ድማ ብፍላይ ድሕሪ’ቲ ኣብ ክልል ኣምሓራ ኣብ መንጐ ዕጡቓት ሓይልትታትን ሰራዊት መንግስቲን ዝተወልዐ ኲናት፡ ጸጥታ እቲ ከባቢ ከምዝላሕልሐን፡ ነቲ መዓስከር ዝግበር ሓለዋ ከምዘየለን እዮም ስደተኛታት ዝገልጹ።

ኣብ ዝሓለፈ ግንቦት፡ ሓደ 50 ዓመት ዝድመኡ፡ ኣቦ 7 ቈልዑ ኤርትራዊ ስደተኛ፡ ካብቲ መዓስከር ተጨውዩ ድሕሪ ምውሳድ ተቐቲሉ ከምዝተረኽበ ይዝከር።

ቅድሚኡ'ውን ወዲ 12 ዓመት ኣማን መሓመድ ዝተባህለ ስደተኛ ቈልዓ ካብ ቤት ትምህርቲ ናብቲ ኣብቲ መዓስከር ዝርከብ ገዛኡ እናተመልሰ ኣብ መገዲ መንነቶም ብዘይተፈልጡ ሰባት ተጨውዩ መበጆ ከምዝተከፍለሉ ይዝከር።

ዮሃንስ "ንሓለዋ እቲ መዓስከር ኣብ ዝምልከት ጉዳይ እቲ ስደተኛ ባዕሉ ብዞን፡ ብሎክ፡ ንኡስ ብሎክ፡ ኮሚኒቲ... እናበለ ብዘቘሞ መሓውር ጸጥታ እዩ ከባቢኡ ዝሕሉ" ብምባል፡ እቲ ካብ ሚሊሻ እቲ ከባቢ ሓለዋ ክግበር እዩ ዝተባህለ ግን ዛጊት ዝዀነ ዝተገብረ ከምዘየለ እዩ ኣተሓሒዙ ዘረድእ።

ኣብ ርእሲ’ዚ ዮሃንስ፡ ሲቪል ነበርቲ እቲ ከባቢ ኣብ ውሽጢ እቲ መዓስከር ኣትዮም ዝተፈላለየ ከም ድኳናት፡ ባራትን ካልእን ዝኣመሰሉ ትካላት ክገብሩ ይፍቀደሎም እዩ ድሕሪ ምባል፡ እዚ ድማ ናይ ገዛ’እ ርእሱ ኣሉታዊ ሳዕቤናት ከምዘለዎ ኣመልኪቱ።

“ገለ ካብኣቶም ንቲ ስደተኛ ኵነታቱ ክፈልጡ የኽእሎም፤ ቅድሚ ሕጂ ካብኣቶም ብስርቂ ተጠርጢሮም ዝተኣስሩ ነይሮም” ኢሉ።

እዚ ኰይኑ፡ እቲ ዝሞተ ሰብ ስነስርዓት ቀብሩ ንምፍጻም ኣብ ምድላው ከምዘለዉ ስድራቤት ይገልጹ።

ኣብ መዓስከር ስደተኛታት ኢትዮጵያ ብሓፈሻ 24 ዓመታት ከምዝተቐመጠ ዝዛረብ ኣሩዳ፡ “ብንእሽተይ እየ መጺአ፡ ኣብዚ እየ ዓብየ” ብምባል እቲ ኣብ ኢትዮጵያ ዘሎ ግጭት ሓድሕድ ድማ ንኵነታቶም ከምዝሓላለኾ ኣምሪሩ ይዛረብ።

እቶም ስደተኛታት፡ እቲ መ’ዓስከር ኣቀምምጣ’ኡ ብፍላይ ኣብ ግዜ ክራማት ንኽትነብሮ ዘይምቹእ ምዃኑ ብተደጋጋሚ ክገልጹ ዝጸንሑ ኰይኖም፡ እዚ እናገነነ ዝመጽእ ዘሎ ኣተሓሳሳቢ ኵነታት ጸጥታ ዝተፈላለዩ ትካላትን መንግስታትን ቈላሕታ ክገብሩሉ ክምሕጸኑ ጸኒሖምን ኣለዉን።