ኣባላት ሓይሊ ባሕሪ ዝርከብኦም ኣሃዱታት ሰራዊት ኤርትራ ናብ ሶማል ከምዝኣተዋ ወትሃደራውያን ምንጭታት ንራድዮ ኤረና ሓቢሮም።
እቶም ልዕሊ 300 ዝግመቱ ኣባላት ሰራዊት ኤርትራ፣ ካብ ወደብ ዓሰብ ብመርከብ ተበጊሶም፣ ኣብ ዝሓለፈ ወርሒ፣ ናብ ሶማል ከምዝኣተዉ‘ዩ እቲ ምንጪ ጠቒሱ።
ኣብ ኤርትራ፣ ልዕሊ 3 ሽሕ ወርትሃደራት ሶማል፣ ኣብ ሓይልታት ምድሪ፣ ኣየርን ባሕርን ይስልጥኑ ከምዘለዉ ይፍለጥ።
ተልእኾ ናይቶም ናብ ሶማል ተዋፊሮም ዘለዉ ኣባላት ሰራዊት ኤርትራ ንጽር እኳ እንተዘይኮነ፣ ምስ ሰራዊት ግብጽን ሶማልን ምሕዝነት ንምድልዳል ዝዕላምኡ ሓባራዊ ወትሃደራዊ ልምምድ ከካይዱ ከምዝኽእሉ ይግመት።
ኣብ ዝሓለፈ ወርሒ፣ ንሶማል፣ ኣጽዋር ብሓገዝ ዝሃበት ግብጺ፣ ብዝሑ ዘይተሓበረ ሰራዊት ናብታ ሃገር ኣዋፊራ ከምዘላ‘ዩ ዝንገር።
እዚ ከምዚ‘ሉ እንከሎ፣ ብርክት ዝበለ ብዝሒ ዘለዎ ሰራዊት ኤርትራ ናብ ዓሰብ ይግዕዝ ከምዘሎ ራድዮ ኤረና ከተረጋግጽ ክኢላ ኣላ።
ንትምህርትን ስልጠናን ተባሂሎም፣ ካብ ኣሃዱታቶም ዝተሳሕቡን ገና ምደባ ክጽበዩ ዝጸንሑን ኣሽሓት ኣባላት ሃገራት ኣገልግሎት፣ ናብ ዓሰብ ይግዕዙ ከምዘለዉ‘ዩ ዝሕብር እቲ ዝረኸብናዮ ሓበሬታ።
ስእሊ፦ ካብ ኣርካይቭስ ኢንተርነት
