ኢትዮጵያ፡ 'ኣፍደገ ባሕሪ ናይ ምርካብ መሰላ ንምርግጋጽ ተካይዶ ጻዕሪ ብዘለዎ ረስኒ' ክቕጽል ምዃኑ ኣፍሊጣ

ኢትዮጵያ ኣፍደገ ባሕሪ ንምርካብ ከተካይዶ ዝጸንሐት ጻዕርታት ከተሐይሎ ምዃና ኣፍሊጣ። ብቀዳማይ ሚኒስተር ኣቢይ ኣሕመድ ዝምራሕ ቤት ምኽሪ ጸጥታ ኢትዮጵያ፡ ሎሚ ኣብ ዘካየዶ ኣኼባ'ዩ ነቲ መግለጺ ኣውጺኡ ዘሎ። እቲ ላዕለዎት ኣዘዝቲ ሰራዊትን ሓለፍቲ ሃገራዊ ድሕነትን ዝርከብዎ ቤት ምኽሪ ንውሽጣዊን ግዳማውን ጸጥታ ዝምልከት ገምጋም ከምዘካየደ ኣብ ዘውጽኦ መግለጺ ይጠቅስ።

ኩነታት ናይታ ትማሊ ሓድሽ ግዝያዊ ፕረዚደንት ዝተመዘዘላ ትግራይን ጉዳይ ኣፍደገ ባሕርን ካብቶም ዓበይቲ ዛዕባታት ናይቲ ኣኼባ'ዮም ነይሮም።

"ናይ ኢትዮጵያ ኣፍደገ ባሕሪ ናይ ምርካብ መሰል ንምርግጋጽ ዲፕሎማስያዊ፡ ሕጋዊን ሰላማዊን መንገድታት መሰረት ብምግባር ዝተጀመረ ሰራሕ በቲ ዝተጀመሮ ረስኒ ክቕጽል ዘኽእል መምርሒ" ከምዝተወሰነሉ እቲ ብረቡዕ ዝወጸ መግለጺ ናይቲ ቤት ምኽሪ የመልክት።

"ናይ ኢትዮጵያ ዓለምለኻዊ ተሰማዕነት ዘዕቢ ዲፕሎማስያዊ ፍረ እናወሰኸ መጺኡ'ሎ" ብምባል ድማ እታ ሃገር ንዞባዊ ርግኣትን ሰላምን ክትሰርሕ ምዃና ይእምት።

ኢትዮጵያ ኣፍደገ ባሕሪ ንምርካብ ከተካይዶ ዝጸንሐት ፈተነታትን ክትህቦም ዝጸንሐት መግለጺታትን ዲፕሎማስያዊ ምትፍናንን ወጥርን ምስዓቡ ከምዘሎ ይፍለጥ።

ኣብ ዝሓለፈ ዓመት ኣብ ገማግም ወሽመጥ ዓደን፡ ወደብን ወተሃደራዊ መዓስከርን ክትረክብ ዘኽእላ ሰነድ ምርድዳእ ምስ ሶማሊላንድ ምፍራማ ነቲ ኣብ ሞቓድሾ ዝርከብ መንግስቲ ከምዘቖጥዐ ይዝከር።

እቲ ሓያል ተቓውሞ ዝገጠሞ ስምምዕ ንልኡላውነት ሶማልያ ዝዳፈር'ዩ ዝበለት ግብጺ፡ ንሞቓድሾ ንምድጋፍ ወተሃደራዊ ስምምዕ ክትፍርም ኣገዲዱ'ዩ።

ኣብ ወርሒ ጥቅምቲ ኣብ መንጎ ኤርትራ፡ ግብጽን ሶማልያን ዝተፈረመ "ስሉሳዊ ስምምዕ ኣስመራ" እውን ንጥሙሕ ድልየታት ኢትዮጵያ ንምግታእ ዝዓለመ ምንባሩ ይፍለጥ።

ብሰንኩ ድማ ኣብ መንጎ ክልቲአን ዝነበረ ዝምድና ናብ ዝኸፍአ ደረጃ ወሪዱ ነይሩ። ብመንጎኝነት ቱርኪ ኣብ ዝተበጽሐ ስምምዕ ኣንካራ'ዩ ናብ ንቡር ናይ ምምላስ ኣንፈት ከርኢ ጀሚሩ።

ኤርትራ ብወገና ብዛዕባ ኣፍደ ቀይሕ ባሕሪ ክቐርብ ንዝጸንሐ መግለጺታትን ምጉትን ኢትዮጵያ ክትቃወሞ ጸኒሓ'ያ።

እቲ ጉዳይ ነቲ እናሓርፈፈ ዝመጽእ ዝነበረ ኣብ መንጎ ክልቲአን ሃገራት ዘሎ ዲፕሎማስያዊ ዝምድና ናብ ዳርባ ቃላትን ወጥርን ከምርሕ ገይሩዎ'ሎ።