ሕሜቲ ንኤርትራ ኣመልኪቱ ዝተዛረቦ እንታይ እዩ?

ሕሜቲ ኣብዚ ናይ ሕጂ መግለጺኡ፡ "ዕሱባት ካብ ኤርትራ ኒጀርን ጫድን ኣምጺኦም ኣለዉ፤ንሳቶም ድማ ኣብ ኡምዱርማን እዮም ዘለዉ፡" እውን ኢሉ።

ንሱ ከም ዝኣመቶ፡ 'እቶም ደገፍ ኤርትራ'ውን ዘለዎም ምስ ሰራዊት ሱዳን ወጊኖም ዝገጥምዎ ዘለዉ ጕጅለታት ዓቢይ ወተሃደራዊ ኢንዳስትሪታት' ከም ዝሃነጹን፡ እዚ ድማ ኣቐዲሙ ኣብ መንጐ ኦሳማ ቢንላደንን ኢራንን ብዝተበጽሐ ስምምዕን ምወላን ምዃኑ ሓቢሩ።

ምስኡ ተተሓሒዙ እቲ ኣብ መደበር ሓይሊ ኣየር ዋዲ ሰይድና ዝወሃብ ዘሎ ስልጠና ድማ ብኢራን ምዃኑ እውን ኣመልኪቱ።

እቲ ሰላም ከም ዝደሊ ግን ድማ፡ ናብቲ ዝሞተ እዩ ዝበሎ ብመንጐኝነት ኣመሪካን ስዑዲ ዓረብን ዝካየድ ዝነበረ ዘተ-ሰላም ጅዳ ደጊም ከምዘይምለስ ዝሓበረ ጀነራል ዳጋሎ፡ ንግብጺ እውን ከሲሱ እዩ።

ግብጺ፡ ዝተፈላለየ ኣጽዋራትን ነፈርትን ከም ዘዕጠቐት ብምጥቃስ፡ እቲ ኣብዚ ቀረባ እዋን ኣብ ፖርት ሱዳን ብሓይልታቱ ዝተገብረ መጥቃዕቲ ድሮን ብሰንኪ ዘውረዶ ዕንወት ድማ ነቲ ግብጺ ኣጽዋራት እተሕልፈሉ ዘላ - ብመሬት ከይተረፈ ትጥቀመሉ ዘላ - መስመራት ንፈልጦ ኢና፤ ነዚ ድማ ኣጥቂዕናዮ ኢና ኢሉ።

ጀነራል መሓመድ ሓምዳን ዳጋሎ - ሕሜቲ፡ እዚ ኣብ ሱዳን ዝካየድ ዘሎ ኲናት ሓድሕድ፡ ዝተፈላለያ ሃገራትን "ግበረሽበራውያን" ዝበሎም ጕጅለታትን ዘሳተፈ፡ ዓለምለኻዊ ተገዳስነት ዘድልዮ ሰፊሕ ኲናት ምዃኑ'ኳ እንተኣመተ፡ እቲ ንሱ ይረኽቦ ኣሎ ዝበሃል ገዚፍ ደገፍ ኢማራት ዓረብ ግን ኣይጠቐሰን።

ሕቡራት ኢማራት ዓረብ፡ ኣብ ጐድኒ ዳዕመ-ሰሪዕ ደው ከም ዝበለትን ብዝተፈላለየ መስመራት ጐረባብቲ ሃገራት ኣቢላ ዘይተኣደነ ወተሃደራዊ ኣጽዋራትን ናውቲን ተቐብሎም ከምዘላን ክትክሰስ ጸኒሓ እያ።

ኢማራት ግን ነዚ ክሲታት ትነጽጐ።