ንመትረብ እንግሊዝ ካብ ዝሰግሩ ስደተኛታት ክንደይ ዝኣኽሉ ዑቕባ ይረኽቡ?

መንግስቲ ዓባይ ብሪጣንያ፡ ስደተኛታት ብንኣሽቱ ጀላቡ ንመትረብ ኢንግሊዝ ንኸይሰግሩ ንምዕጋት፡ ገለ ሓተቲ ዑቕባ ናብ ሩዋንዳ ክሰጉግ ድሌት ኣለዎ።

ቀዳማይ ሚኒስተር ሪሺ ሱናክ ኣብ ሓፈሻዊ መረጻ እታ ሃገር እንተተዓዊቱ፡ ናብ ሩዋንዳ ዝግበሩ ቀዳሞት በረራታት ኣብ መወዳእታ ወርሒ ሓምለ ከምዝጅምሩ ቃል ኣትዩ ኣሎ።

ይኹን’ምበር ሰር ኬር ስታርመር ግን ሰልፊ ሌበር እንተተዓዊቱ፡ ነቲ ትልሚ ሩዋንዳ ክስርዞ ምዃኑ እዩ ዝገልጽ።

ኣብ ክንድኡ ድማ ሕጊ ጸረ-ሽበራ ተጠቒሙ ኣብ መላእ እቲ መትረብ ስደተኛታት ንዘሰጋግሩ ጕጅለታት ደው ከብል ተሓንዩ ኣሎ።

ብንኣሽቱ ጀላቡ ክንደይ ስደተኛታት ይሰግሩ?

ኣብ 2024 ክሳዕ 26 ሰነ ጥራይ 13,195 ሰባት ንመትረብ እንግሊዝ ሰጊሮምዎ ኣለዉ።

እዚ ድማ ካብቲ ኣብ ዝሓለፈ ኣርባዕተ ዓመታት ኣብ ተመሳሳሊ እዋን ዝነበረ ቁጽሪ ዝዛይድ እዩ።

ኣብ 2023 ብሓፈሻ 29,437 ሰባት በዚ መንገዲ ናብ ዓዲ እንግሊዝ ኣትዮም።

እዚ ካብቲ ኣብ 2018 ኣሃዛት ምእካብ ካብ ዝጅምር ዝለዓለ ዝነበረ ኣብ 2022 ዝተመዝገበ ጠቕላላ 45,755 ቁጽሪ ዓቢ ምንካይ ዘርኣየ እዩ።

ካብ 2018 ጀሚሩ ኣስታት 120 ሽሕ ሰባት በዚ መንገዲ ናብ ዓዲ እንግሊዝ ኣትዮም ኣለዉ።

ብንኣሽቱ ጀላቡ ዝሰግሩ መን እዮም?

ኣብ መጋቢት 2024፡ ንመትረብ እንግሊዝ ዝሰገሩ ልዑል ቁጽሪ ዘለዎም ስደተኛታት ኣፍጋኒስታናውያን እዮም።

ብንኣሽቱ ጀላቡ ካብ ዝሰገሩ ስደተኛታት ነቲ ኣስታት 20 ሚእታዊት ይሕዙ።

ኢራናውያን ብ12 ሚእታዊት ከምኡ’ውን ቱርካውያን ብ11 ሚእታዊት ኣብ ቀጻሊ ደረጃ ይርከቡ።

ካብዚ ቀጺሉ ዝርከቡ ድማ ስደተኛታት ኤርትራ እዮም።

ክሳዕ መጋቢት 2024 ኣብ ዝነበሩ ኣብ 12 ኣዋርሕ ብንኣሽቱ ጀላቡ ካብዝኣተዉ ኣስታት 85% ደቂ ተባዕትዮ እዮም።

ዓለምለኻዊ ትካል ስደተኛታት ኣብ መንጎ 2018ን 2023ን ብውሕዱ 159 ስደተኛታት ኣብ ቻነል እንግሊዝ ከምዝሞቱ ይግምት።

ክንደይ ሰባት ዑቕባ ይሓቱ?

ኣብ 2023 ልዕሊ 84 ሽሕ ሰባት ዑቕባ ሓቲቶም ነይሮም።

ኣብ ምሉእ 2022 ዑቕባ ዝሓተቱ ትሕቲ 100 ሽሕ ሰባት እዮም። ካብዚኦም ብንኣሽቱ ጀላቡ ዝመጹ ኣስታት 45 ሚእታዊት ነይሮም። ናይዚ ተነጻጽሪ ኣሃዝ 2023 ኣይተረኽበን።

ኣብ 2002 ኣብ ኣፍጋኒስታን፡ ሶማልያን ዒራቕን ካብ ዝነበረ ግጭታት ዝሃደሙ ሰባት ኣብ ዝነበሩሉ እዋን፡ ቁጽሪ ዓመታዊ ሕቶታት ዑቕባ ኣብ ዝለዓለ ጥርዙ በጺሑ ነይሩ።

ኣብ 2010 ድማ ናብ 22,600 ወሪዱ።

እንተዀነ፡ ስደተኛታት ካብ ሶርያ ስለዝሃደሙ፡ ኣብ ምሉእ 2010ታት እቲ ቁጽሪ መሊሱ በሪኹ።

ሓተቲ ዑቕባ ዓባይ ብሪጣንያ ካበይ ይመጹ?

ኣብ 2023፡ ዝበዝሑ ሓተትቲ ዑቕባ ዓባይ ብሪጣንያ ካብ ኣፍጋኒስታን ዝመጹ እዮም፤ እዚ ቁጽሪ 9,307 ነይሩ።

ቀጺሉ ዝዓበየ ጉጅለ፡ ኣስታት 7,400 ሰባት፡ ካብ ኢራን ዝመጹ ኰይኖም፡ ፓኪስታን፣ ህንዲን ባንግላድሽን ድማ ስዒቡ ዘሎ ኣሃዝ ዝሕዛ ሃገራት እየን።

ኣብ 2022 ልዕሊ 17,300 ሰባት ዑቕባ ብምሕታት ኣልባኒያውያን ዝለዓለ ቁጽሪ ይሕዙ። መብዛሕትኦም ካብዚኦም (73 ሚእታዊት) ብንኣሽቱ ጀላቡ ዝኣተዉ እዮም።

ሃገሮም ብሩስያ ድሕሪ ምውራራ ናብ ዓዲ እንግሊዝ ዝኣተዉ ዩክረይናውያን ስደተኛታት ኣብዚ ኣሃዛት ኣይካተቱን።

ክሳብ 11 ሰነ 2024፡ ብመንግስቲ ዓባይ ብሪጣንያ ብዝተዳለወ ሕጋዊ መስመራት ንዝመጹ ዩክረይናያን ስደተኛታት 259,200 ቪዛ ተዋሂቡዎም እዩ።

ካልኦት ውሑዳት ፍሉያት ጉጅለታት ከም ስደተኛታት ኣፍጋኒስታንን ገለ ዜጋታት ሆንግ ኮንግን እውን ናብ ዓዲ እንግሊዝ ክአትዉ ዘኽእሎም ዝተፈላለየ ኣገባብ ኣሎ።

ክንደይ መስርሕ ጉዳያት ዑቕባ ክካየዱ ትጽቢት ይግበር?

ገለ ስደተኛታት ሕቶኦም መልሲ ክሳዕ ዝረክብ ንሓያሎ ኣዋርሕ ወይ ዓመታት እውን ከይተረፈ ክጽበዩ ይግደዱ እዮም።

ኣብ ስርዓት ዓባይ ብሪጣንያ ዝተራእየ ምድንጓያት፡ ብሓፈሻ ልዕሊ 128 ሽሕ ጠለባት ገና መልሲ ከይተወሃቦ ድሕሪት ተሪፉ ይርከብ።

እቲ ቀዳማይ ሚኒስተር ኣብ መወዳእታ 2023 ድሕሪት ዝተረፉ ጉዳያት ከጽርዮ ቃል ኣትዩ'ኳ እንተነበረ፡ 4500 "ዝተሓላለኹ ጉዳያት" ግን ገና ኣብ መወዳእታ ወርሒ ታሕሳስ ውሳነ ይጽበዩ ነይሮም።

ወግዓዊ ኣሃዛት ከምዘመልክትዎ ብዕለት 14 ሚያዝያ 2024፡ ካብቶም ኣመልከቲ 2,377 ጥራይ ገና ናይ መጀመርታ ውሳነ ይጽበዩ ነይሮም።