ኣብ ኤርትራ ተታሒዞም ዝጸንሑ ባሕረኛታት ኣዘርባዣን ተፈቲሖም

ንሓያለ ኣዋርሕ ኣብ ኤርትራ ተታሒዞም ዝጸንሑ ባሕረኛታት ከምዝተለቁ ማዕከናት ዜና ኣዘርባዣን ሓቢረን። እቶም 18 ኣዘርባዣናውያን ዝርከብዎም ባሕረኛታት ምስተን ብዘይፍቓድ ናብ ልኡላዊ ማያት ኤርትራ ብምእታወን ብሓለዋ ባሕሪ ዝተታሕዛ ሰለስተ መራኽብ ኣዘርባዣን ዝነበሩ'ዮም። ንመንግስቲ ቅርበት ዘለዎ ትረንድ ዝተባህለ ማዕከን ትማሊ ሰኑይ ኣብ ዘውጽኦ ጸብጻብ እቶም ኣብ ወደብ ዓሰብ ተታሒዞም ከምዝጸንሑ ዝንገረሎም "ዜጋታት ኣዘርባዣን ዝኾኑ ኣባላት" እተን መራኽብ ናብ ሃገሮም ከምዝተመልሱ ሓቢሩ'ሎ።

ኣገልግሎት ፕረስ ኣዘርባዣን ዝተባህለ ካልእ መርበብ ዜና ብወገኑ፡ ዜጋታት እታ ሃገር ዝኾኑ ኣባላት እተን መራኽብ ከምዝተፈትሑ ይገልጽ።

"ድሕሪ ነዊሕ ልዝብ፡ ካብ 7 ሕዳር 2024 ኣብ ኤርትራ ተቐይዶም ዝጸንሑ 18 ዜጋታት ኣዘርባዣን ተለቒቖም ኣለዉ"።

ፕረዚደንት እታ ሃገር ፕረዚደንት ኢለሃም ኣሊየቭ "ብዝሃቦ መምርሒ" ከምዝተፈትሑ'ውን እቶም ማዕከናት ዜና ጠቒሶም።

እቶም ጸብጻባት ብዛዕባ ኩነታት እተን መራኽብ ይኹን እቶም ዝተረፉ ካልእ ዜግነት ዘለዎም ኣባላተን ግን ዝሃብዎም ዝኾነ ሓበሬታ የለን።

ቱርኪ ኣብ ምፍታሕ እቶም ባሕረኛታት ግደ ከምዝነበራ'ውን ንሰብመዚ ኣዘርባዣን ብምጥቃስ ገሊጾም።

"ኤምባሲ ቱርኪ ኣብ ሃገረ ኤርትራ ንዝገበሮ ቀጥታዊ ደገፍ ዘለና ዓሚቚ ምስጋና ንገልጽ" ይብል ሚኒስትሪ ጉዳያት ወጻኢ ኣዘርባዣን።

ወናኒ እተን መራኽብ ከምዝብሎ፡ ኣብ ፈለማ ወርሒ ሕዳር'የን "ብሰንኪ ዘጋጠመን ሕማቕ ኵነታት ኣየር ናብ ልኡላዊ ማያት ኤርትራ" ድሕሪ ምእታወን ብሓይሊ ባሕሪ ኤርትራ ተታሒዘን።