ብሪጣንያ፡ ብፈተነ ቅትለት ኤርትራዊ ገበነኛ ዝዀነ ደጋፊ ሂትለር ንሕልፈት ተፈሪዱ

ንዋሕዚ ስደተኛታት ዝቃወም ሕሉፍ የማናዊ ዓሌተኛ ብፈተነ ቅትለት ኤርትራዊ ሓታቲ ዕቝባ ንዕድመ ልክዕ ማእሰርቲ ተፈሪዱ። ወዲ 32 ዓመት ካለም አሊሲስ ፓርስሎው፡ ናብ ሓደ ስደተኛታት ተዓቚቦምሉ ዝነበሩ ሆቴል ብምእታው ንናሆም ሓጐስ ዝተባህለ ኤርትራዊ ኣብ ኣፍልቡን ኢዱን ብኻራ ድሕሪ ምውግኡ'ዩ ተኸሲሱ።

ነቲ መስርሕ ፍርዲ ዝመርሐ ዳኛ ዶቭ፡ ኣብ ልዕሊ ናሆም ሓጐስ ዝፈጸሞ መጥቃዕቲ፡ ብ"ንኣኽራሪ፡ ዓመጽን ዓሌታዊ ኣረኣእያ ዝተጠምዘዘ፡ ኣተሓሳስባ ሕሉፍ የማናዊ ደጋፊ ናዚ" ዝተደፋፍአ'ዩ ኢሉ።

"ኣብ ልዕሊ ዘይፈልጦ ሰብ ብዝፈጸሞ ዕሱብን ዘይተሓስበን መጥቃዕቲ" እቲ ግዳይ "ከቢድ መጕዳእቲ" ከምዝበጽሖ'ውን ወሲኹ ሓቢሩ።

ኣብ እዋን ፍርዱ ፓርስሎው፡ ብሕርቃንን ብስጭትን" ተደሪኹ "ንሓደ ካብቶም ብመትረብ እንግሊዝ ዝኣተዉ ስደተኛታት ንምውጋእ" ብ2 ሚያዝያ ናብቲ ኣብ ከባቢ ከተማ ዎርቸስተር ዝርከብ ሆቴል ከምዝኸደ ንቤትፍርዲ ገሊጹ።

ኣብ 2024 ኣብ ቤት ፍርዲ ዘውዲ ሌስተር ንሰለስተ ሰሙን ኣብ መስርሕ ፍርዲ ድሕሪ ምሕላፉ ሕጂ ብፈተነ ቅትለት ተፈሪዱ'ሎ።

ብተወሳኺ ምስዚ ብዘይተኣሳሰር፡ ጾታዊ ገበንን ጭንቀት ንምፍጣር ዝዓለመ ኤሌክትሮኒያዊ መልእኽቲ ብምልኣኽን ኣብ ዝብሉ ክልተ ክስታት እውን ገበነኛ ምዃኑ ተኣሚኑ።

እቲ ዳኛ፡ እቲ እንኮ ግቡእ መቕጻዕቲ ዕድመ ልክዕ ማእሰርቲ ምዃኑ ብምግላጽ፡ ፓርስሎው "ብሰንኪ ተወሳኺ ዓመጽቲ ገበናት ኣብ ልዕሊ ህዝቢ ከቢድ ጉድኣት ከብጽሕ ልዑል ሓደጋ ከምዘሎ" ገሊጹ።

ወዲ 25 ዓመት ኤርትራዊ ናሆም ሓጐስ፡ ክሳብ ሕዳር 2028 ዝጸንሕ መንበሪ ፍቓድ ዝተዋህቦ እዩ።

ናሆም ቅድሚ ሕጂ ኣብቲ ሆቴል'ዩ ዝነብር ነይሩ። እቲ መጥቃዕቲ ኣብ ዝተፈጸመሉ እዋን ድማ ብሽክለታ ክልቃሕ እዩ ተመሊሱ ነይሩ።

ፓርስሎው ነቲ ኣብ ልዕሊ ናሆም ዘካየዶ መጥቃዕቲ ንምፍጻም 1000 ዶላር ከፊሉ ብኦንላይን ፍሉይ ካራ ከምዝዓደገ'ውን እቲ ቤትፍርዲ ሰሚዑ።

ዳኛ ዶቭ፡ ሓደ ክሊኒካዊ ክኢላ ስነ-ኣእምሮ፡ ናሆም ሓጐስ ከም ቀጥታዊ ውጽኢት ናይቲ መጥቃዕቲ ጭንቀትን ስንባደን ከምዝሓደሮ ምርግጋጹ ሓቢሩ።

ዓቃቢ ሕጊ ኣብ ቤት ፍርዲ ኣብ ዘንበቦ ቃል እቲ ግዳይ፡ እቲ መንእሰይ ኣብ ኢዱ "ዘሕዝን ቃንዛ" ከምዘጋጠሞን ብሰንኪ እዚ ድማ ንምድቃስ ከምዝቃለስን ጠቒሱ።

"ቅድሚ እቲ ፍጻመ ሕጉስ ህይወት ክመርሕ'የ ጸኒሐ" ይብል ናሆም። "እዚ ሕጂ ዘይሕሰብ'ዩ።"

"ጽምዋ ይስምዓኒ፡ ኣብ ጽርግያ ድማ ውሕስነት ኣይስምዓንን'ዩ። ህይወተይ ተገለባቢጡ'ሎ።"

ሓላፊ ክፍሊ ጸረ ግብረሽበራ ኣገልግሎት ዓቃቢ ሕጊ ዘውዲ ዝዀነት ቢታን ደቪድ፡ "እዚ መጥቃዕቲ ንሓደ ክፋል ህዝቢ - ማለት ሓተትቲ ዑቕባን ንሓተቲ ዑቕባ መንበሪ ዝህቡን ንምፍርራሕ ዝተፈጸመ'ዩ" ኢላ።

"ካሉም ፓርስሎው ዝነበሮ ደጋፊ ናዚ ኣረኣእያታት ንሓደ ሰብኣይ ኣብ ሕብሪ ቆርበቱን መበቆሉን ጥራይ ተመርኲሱ ብሕሱም መንገዲ ከጥቅዖ ደሪኽዎ፤ ኣብ መንጐ ሓደ ማሕበረሰብ ድማ ፍርሒ ከስፋሕፍሕ ጽዒሩ" ክትብል ወሲኻ ገሊጻ።

"እዚ ተግባር ግብረሽበራ እዩ።"

ምንጪ ስእሊ,West Midlands Police / PA Media