ኤርትራ ንሙላቱ ተሾመን 'ምትዂታዂ ኢትዮጵያን' ዝሃበቶ ተሪር ግብረመልሲ

ሚኒስተር የማነ ካልእከ እንታይ በለ?

ነቲ ንኲናት ትግራይ ደው ዘበለ ኣብ መወዳእታ 2022 ዝተፈረመ ስምምዕ ፕሪቶርያ ብዝምልከት ኣብ ዝሃቦ መብርሂ፡ ውሽጣዊ ጉዳይ ኢትዮጵያ ምዃኑ'ዩ እቲ ሚኒስተር ኣፍሊጡ ዘሎ።

ፕረዚደንት ነበር ሙላቱ ይኹን ካልኦት ተዓዘብቲ ግን ኤርትራ በቲ ስምምዕ ከምዘይተሓጎሰት'ዮም ክገልጹ ጸኒሖም።

ፕረዚደንት ኢሳይያስ እቲ ኣብ ደቡብ ኣፍሪቃ ኣብ ሞንጎ ህወሓትን ፈደራላዊ መንግስቲ ኢትዮጵያን ብሞንጎኝነት ሕብረት ኣፍሪቃን ካልኦት መሻርኽትን ዝተበጽሐ ስምምዕ ብኣመሪካ ዝተወጠነ "ናይ ምኹላፍ ታክቲክ እየ ዝብሎ" ክብል ኣብ ለካቲት 2023 ገሊጽዎ ነይሩ።

እንተኾነ ግን፡ እቲ ጉዳይ ንኤርትራ ከምዘይምልከት'ዩ እቲ ሚኒስተር ዜና ገሊጹ ዘሎ።

"ቅድሚ ሕጂ ከምዝተሰምረሉ፡ ስምምዕ ፕሪቶሪያ ንመንግስቲ ኢትዮጵያን ውሽጣዊ መቐናቕንቱን ጥራይ ዝምልከት'ዩ"።

"ኤርትራ፡ ነቲ ውጹእ ናይ ኢትዮጵያ ውሽጣዊ ጉዳይ [ዝኾነ ስምምዕ] ንምዕንቃፍ ይኹን ንምትንካፍ ተገዳስነት ይኹን ሸውሃት የብላን" ይብል ሚኒስተር የማነ።

ምስ ጉዳይ ወተሃደራዊ ህላወ ኤርትራ ኣብ ትግራይ ብዝምልከት ድማ፡ ሰራዊት ኤርትራ ድሕሪ'ቲ ስምምዕ ጠቕሊሉ ካብቲ ክልል ከምዝወጸ ደጊሙ ገሊጹ'ሎ።

"ኤርትራ ወተሃደራታ ከምቲ ግቡእ ናብቲ ዓለምለኻዊ ኣፍልጦ ዘለዎ ልኡላዊ ዶባታ ኣውጺኣቶም እያ" ብምባል ኣብ ጥቓ ዶባት ኣብ ዝርከብ ገለ ከባቢታት ትግራይ ከምዘለዉ ዝወሃብ መግለጺታት "ሓሶት" ምዃኑ የረድእ።

ሰብመዚ ትግራይ፡ ሓይልታት ኤርትራ ኣብ ገለ ከባቢታት ሰሜናዊ ምብራቕ (ከባቢ ኢሮፕን)፡ ከምኡ'ውን ሰሜን-ምዕራብ ትግራይ ኣብ ውሽጢ ግዝኣት ኢትዮጵያ ከምዘለዉ'ዮም ክገልጹ ዝስምዑ።

ሚኒስተር የማነ ግን እዚ መግለጺታት'ዚ ነቲ ብውሳነ ኮሚሽን ዶብ ንኤርትራ ዝተዋህበ ባድመ ዝርከቦም ከባቢታት ዘነጻጸረ ምዃኑ'ዩ ኣብ መግለጺኡ ዝኸስስ።

ኢትዮጵያ ምስ ሶማሊላንድ ዝፈረመቶ "ዘይግሉጽ" ክብል ዝገለጾ ምርድዳእ'ውን ኣብቲ ዞባ ወጥሪ ኣስዒቡ ኣሎ ክብል እቲ ኤርትራዊ ብዓልስልጣን ነቒፉ።

ኤርትራ ንፈለማ እዋን'ያ ብወግዒ ነቲ ኣብ ዞባ ቀርኒ ኣፍሪቃ ስግኣት ዝፈጠረ ምርድዳእ ሶማሊላንድ ዘለዋ ርእይቶ ብቐጥታ ገሊጻ ዘላ። ምስ ሞቓድሾ ከተካይዶ ዝጸንሐት ይኹን ንመራሕቲ ግብጽን ሶማልያን ዘጠቓለለ ስሉሳዊ ዋዕላ ኣስመራ ልኡላውነት ሶማልያ ክቑረስ ከምዘይብሉ ብንጹር ዝገለጸ ምንባሩ ይዝከር።